Asíutúrinn setur strik í reikninginn varðandi fram­tíð Son

Ástæða þess að erfitt gæti reynst fyrir forráðamenn félagsins að taka ákvörðun um framtíð Son hjá félaginu er nokkuð einföld. Liðið stefnir á að spila tvo æfingaleiki í Suðaustur-Asíu undir lok sumars þar sem Son er vægast sagt í miklum metum hjá aðdáendum.

Fyrri leikur Tottenham af þessum tveimur fer fram í Hong Kong þann 31. júlí, þar sem liðið mætir Arsenal. Þremur dögum síðar á liðið svo að mæta Newcastle í Seoul í Suður-Kóreu, heimalandi fyrirliðans.

Sögur eru á kreiki um að forráðamenn Tottenham séu tilbúnir að selja Son í sumar, en hann á aðeins eitt ár eftir af samningi sínum við félagið. Lið í Sádi-Arabíu eru sög áhugasöm og forráðamenn Tottenham vilja líklega fá eitthvað fyrir leikmanninn frekar en að leyfa honum að fara frítt á næsta ári.

Fari það hins vegar svo að félagið ákveði að selja leikmanninn í sumar gæti það hins vegar haft slæm fjárhagsleg áhrif á félagið. Eins og áður segir er Son í miklum metum hjá knattspyrnuunnendum í Suðaustur-Asíu, og þá sérstaklega í heimalandinu Suður-Kóreu, þar sem hann er svo gott sem í guðatölu.

Suður-kóreskir aðdáendur gera því líklega fastlega ráð fyrir því að fá að berja átrúnaðargoðið augum þegar Tottenham mætir á svæðið í byrjun ágúst, en verða líklega allt annað en sáttir ef fari það svo að hann mæti ekki á svæðið.