Játar sök vegna smygls á 60 kílóum af kannabisi

Emmanuel-Thomas var handtekinn í september síðastliðnum eftir að 60 kíló af kannabisi fundust í ferðatöskum frá Bangkok á Stansted-flugvöll í Lundúnum. Hann var þá leikmaður Greenock Morton í skosku B-deildinni en félagið sagði upp samningi hans eftir handtökuna.

Enski sóknartengiliðurinn neitaði sök í september en hefur samkvæmt The Athletic nú snúist hugur og játaði aðild að málinu. Auk Emmanuel-Thomas voru þær Rosie Rowland, 33 ára, og Yasmin Piotrowska, 29 ára, handteknar á Stansted.

Konurnar eiga að hafa flutt efnið inn en þeim hefur verið sleppt og verða ekki ákærðar vegna málsins. Samkvæmt saksóknaranum í málinu héldu þær að gull væri í töskunum tveimur, en ekki kannabis.

Talið er að andvirði kannabissins sé um 600 þúsund pund, sem jafngildir rúmlega 103 milljónum króna á núvirði.

Emmanuel-Thomas þótti mikið efni á yngri árum en hann yfirgaf Arsenal árið 2011, þá 21 árs gamall. Síðan þá hefur hann leikið í neðri deildum á Englandi með liðum á við Ipswich, Bristol City og QPR en hann lék eina leiktíð með PTT Rayong í Taílandi árið 2019.

Hann kom hingað til lands haustið 2021 með skoska liðinu Aberdeen og var í byrjunarliðinu í 3-2 sigri þess á Breiðabliki á Laugardalsvelli. Dvölin hjá Aberdeen fór ekkert stórkostlega en Emmanuel-Thomas lék 15 deildarleiki fyrir liðið og tókst ekki að skora.

Hann bíður nú dóms vegna skipulagningar á smygli ólöglegra efna til Bretlands en hæsti dómur í slíku máli er 14 ára fangelsisdómur.