Segist á­stæða þess að Taylor Swift sé ekki lengur „heit“

„Hefur einhver tekið eftir því að síðan ég sagði: „ÉG HATA TAYLOR SWIFT“, er hún ekki lengur „heit?““

Þetta skrifaði Trump, sem er 78 ára gamall og forseti Bandaríkjanna, á Truth Social í dag. Líklegt er að Trump sé að tala um vinsældir stórstjörnunnar en ekki útlit hennar.

Hvert tilefni skrifa forsetans er, það er þó önnur spurning.

Trump hefur þó nokkrum sinnum í gegnum árin skotið föstum skotum á Swift, sem lýsti yfir stuðningi við Joe Biden í forseta kosningunum 2020 og við Kamölu Harris í kosningunum í fyrra.

Sjá einnig: „Barn­lausa katta­konan“ lýsir yfir stuðningi við Har­ris

Þar áður, árið 2018, lýsti hún yfir stuðningi við Demókrataflokkinn í þingkosningum þessa árs.

Sjá einnig: Trump-liðar telja sig svikna af Taylor Swift

Eftir stuðningsyfirlýsingu Swift við Harris skrifaði Trump á samfélagsmiðil sinn að hann hataði Taylor Swift.

Árið 2023 sagði Trump þó að honum þætti Swift vera falleg.

„Mér finnst hún falleg. Mjög falleg. Mér finnst hún mjög falleg. Ég held að hún sé frjálslynd. Henni er líklega ekki vel við Trump,“ sagði Trump samkvæmt Variety.

„Mér heyrist hún vera mjög hæfileikarík. Ég held hún sé mjög falleg, í rauninni óvenjulega falleg.“

Þegar kemur að vinsældum Swift, þá varð hún árið 2023 milljarðamæringur, í dölum talið. Samkvæmt Forbes varð hún þá fyrst allra tónlistarmanna milljarðamæringur að mestum hluta vegna tekna af tónlist. Hún er nú metin á 1,6 millarð dala en það samsvarar um 207 milljörðum króna.

Samkvæmt Forbes var það að mestu rakið til Eras-tónleikaferðalags hennar og virði laga hennar.

Tónleikaferðalagið Eras stóð yfir frá mars 2023 til desember í fyrra og spilaði hún 149 tónleika í 51 borg, víðsvegar um heiminn. New York Times segir það hafa verið arðbærasta tónleikaferðalag sögunnar og að Swift hafi halað inn rúmum tveimur milljörðum dala fyrir miða.

Það er meira en tvöfalt meira en nokkrum öðrum tónlistarmönnun hefur tekist. Coldplay halaði inn um milljarði dala fyrir 156 tónleika ferðalag um heiminn, sem lauk fyrr árið 2024 og varð það þá tekjuhæsta tónleikaferðalag sögunnar.