Komst í jólaskapið í septem­ber

Anda að sér hátíðarskapi

Margrét Katrín Guttormsdóttir er listamaður Heiðmerkur í ár en hvert ár er listamaður tilnefndur til að skreyta einstakt jólamarkaðstré Heiðmerkur sem prýðir jólaþorpið við Elliðavatnsbæ.

Blaðamaður ræddi við Margréti um verkefnið.

„Hjördís Jónsdóttir, viðburða- og jólamarkaðsstjóri Skógræktarfélags Reykjavíkur, sér um að skipuleggja jólamarkaðinn í Heiðmörk sem skartar jólatrénu ásamt alls kyns fallegri list frá handverksfólki sem er til sölu. Sömuleiðis verða fullt af skemmtilegum viðburðum. Þannig það er hægt að mæta upp í Heiðmörk hverja helgi fyrir jól til þess að anda að sér hátíðaskapi.

Hjördís hafði samband við mig og spurði hvort ég vildi vera sá listamaður sem skreytir jólamarkaðstréð í ár. Þetta tré er alveg frekar stórt svo þetta var ný og skemmtileg áskorun til að taka að sér.“

Jólaskapið geri skammdegið bærilegra

Hún segir að ferlið hafi sannarlega lífgað upp á hversdagsleikann.

„Það að byrja snemma að búa til jólaskraut gerði haustið og skammdegið bærilegra. Ég byrjaði á því að mæta í Skógræktarfélag Reykjavíkur í Heiðmörk og fékk að læra margt um tré þar sem mig langaði að vinna með greinar sem gátu svignað og forma þær til.

Þannig lærði ég að víðigreinar eru oft notaðar í að vefa körfur vegna sveiganleika, sem var ótrúlega spennandi efniviður fyrir textíllistakonu eins og mig. Þannig byrjaði ég að vinna með alls konar efnivið frá Heiðmörk og ég fór að prófa mig áfram að búa til skraut út frá greinum og garni og vefnaði.“

Að sögn Margrétar er margt skemmtilegt sem stendur upp úr en þó sérstaklega þetta:

„Það er jólaskapið sem ég hef komist í við að vinna þetta. Ég fékk hjálp frá fjölskyldu minni líka við að búa til skraut og það var ein skemmtilegasta jólastund sem ég hef átt. 

Sömuleiðis að mæta upp í Heiðmörk og sjá starfsemina þar, það var orðið jólalegt í september hjá þeim sem gaf mér svo mikla orku til þess að vinna þetta verkefni.“

Lærði að tjá listsköpun í gegnum hreyfingu

Margrét hefur haft ástríðu fyrir list frá blautu barnsbeini.

„Ég hef lengi verið í dansi og lærði þar að tjá listsköpun í gegnum hreyfingu sem hefur síðan yfirfærst í textíl. Ég fór í gegnum nokkur stig og skóla til að þora á endanum að fara í textílnám en ég fann mig mjög mikið þar og þaðan var ekki aftur snúið.

Þar náði ég að finna leið til þess að nýta hreyfingar úr dansinum og textíl saman og síðan hef ég gert nokkur verk sem tengja akkúrat þessa tvo hluti saman,“ segir Margrét en hún gerði það meðal annars í lokaverkefni sínu úr vöruhönnun frá Listaháskóla Íslands.

„Sniðugleikinn“ einkennandi

Hún fer einstakar leiðir í sinni listsköpun og hefur fundið hálfgert nýyrði sem nær utan um það sem einkennir hana sem listakonu.

„Það væri eins konar sniðugleiki, ef ég get notað það sem orð. Það heillar mig oft þegar hlutir fá nýtt hlutverk eða er breytt á einhvern hátt. Eins og vefnaður sem er snúinn, en ætti í raun að vera beinn eða grein í fullkomnu hringformi eins og ég notaði við jólaskrautið. 

Það er held ég eitthvað mjög mannlegt við það að vilja hafa áhrif á hlutina í kringum okkur og mér þykir gaman að vekja athygli á því.“

Margrét er mikið jólabarn og að lokum berst talið að hennar uppáhalds jólahefð.

„Þær eru svo margar en kannski sú helsta er jólamyndir, bæði að horfa á einhverjar klassískar en líka prófa nýjar. Ég hef sérstaklega þurft að finna nýjar til þess að horfa á á meðan jólatrésskrautið var búið til. 

En ég held að það sé líka komin ný hefð núna og það er jólaföndrið með fjölskyldunni og búa til skraut saman, það gæti ekki verið betra.“

Hægt er að skoða listaverk Margrétar á Jólamarkaðinum í Heiðmörk. Jólamarkaðurinn er opinn allar aðventuhelgar fram að jólum milli klukkan 12-17 þar sem hægt er að fá sér íslenskt jólatré beint úr Heiðmörk, ylja sér við heitt kakó og nýristaðar möndlur í skóginum.