Stuðnings­menn Real Madrid fá fleiri góðar fréttir

Frá þessu er greint á The Athletic. Þar segir að Davies muni ganga í raðir Real Madrid í sumar eða næsta sumar.

Stuðningsmenn Real Madrid fá því ekkert nema góðar fréttir þessa dagana. Í síðustu viku var greint frá því Kylian Mbappé myndi koma til liðsins frá Paris Saint-Germain í sumar.

Samningur Davies við Bayern rennur út á næsta ári. Bakvörðurinn eldsnöggi mun annað hvort fara til Real Madrid á frjálsri sölu þá eða að spænska félagið kaupi hann eftir þetta tímabil, á lægra verði en hann myndi alla jafna vera seldur fyrir.

Davies gekk í raðir Bayern frá Vancouver Whitecaps í janúar 2019. Kanadamaðurinn hefur fimm sinnum orðið þýskur meistari með Bayern og einu sinni Evrópumeistari.

Í vetur hefur Davies leikið 27 leiki fyrir Bayern í öllum keppnum og skorað eitt mark.