Báðu Ísraela um að bíða með innrás

Bandaríkjamenn vilja, samkvæmt heimildum New York Times, einnig meiri tíma til að undirbúa sig fyrir árásir vígahópa sem tengjast Íran á herstöðvar sínar í Mið-Austurlöndum. Talið er líklegt að þeim muni fjölga með innrás á Gasa.

Þegar hafa nokkrar árásir verið gerðar og minnst ein með drónum sem framleiddir eru í Íran.

Sjá einnig: Árásir gerðar á herstöðvar Bandaríkjanna

Bandaríkjamenn hafa verið að auka viðbúnað sinn í Mið-Austurlöndum. Þeir eru með flota í austurhluta Miðjarðarhafsins og þar á meðal hersveitir landgönguliða og er verið að senda annað flugmóðurskip og meðfylgjandi flota á svæðið, líklega til Persaflóa.

Þá hafa herþotur verið sendar til Jórdaníu.

Ráðamenn í Bandaríkjunum segja þetta hafa verið gert vegna mikils óstöðugleika á svæðinu en Biden og aðrir hafa varað klerkastjórn Íran við að reyna að nýta sér stríðið milli Ísraela og Hamas. Eins og áður segir stjórna Íranar vígahópum víða um Mið-Austurlönd og hafa stuttu marga þeirra, eins og Hamas.

Heimildarmenn New York Times í ríkisstjórn Bandaríkjanna segja beiðnir um að beðið verði með innrás ekki vera kröfur og að ríkisstjórn Joe Biden, forseta, styðji Ísraela og ætlanir þeirra um að gera út af við Hamas-samtökin, sem hafa stjórnað Gasaströndinni frá 2005.

Embættismaður í sendiráði Ísraels í Washington þvertók fyrir að Bandaríkjamenn hefðu beðið Ísraela um að bíða með innrásina.

Biden og Benjamín Netanjahú, forsætisráðherra Ísrael, töluðu saman í gær og eru þeir sagðir hafa verið sammála um að neyðarbirgðir myndu yrðu áfram sendar til Gasastrandarinnar frá Egyptalandi en slíkir flutningar hófust undir eftirliti Sameinuðu þjóðanna um helgina. Ísraelar vilja tryggja að birgðirnar; matvæli, lyf, eldsneyti, vatn og annað, endi ekki í höndum vígamanna Hamas-samtakanna.

Þeir ræddu einnig tilraunir til að frelsa þá gísla sem Hamas-liðar tóku í árás þeirra á Ísrael þann 7. október. Talið er að um 222 gíslar séu enn í haldi Hamas en mæðgum var sleppt á undanförnum dögum.

Viðræður um gíslana eiga sér stað í gegnum yfirvöld í Katar, þar sem æðstu leiðtogar Hamas búa. Forsvarsmenn samtakanna hafa sagt að þeir muni ekki sleppa gíslum, verði gerð innrás.

Hver dagur sagður hagnast Ísraelum

Ísraelski miðillinn Haaretz segir ísraelska herinn bíða eftir skipunum frá ríkisstjórninni um innrás. Haft er eftir heimildarmönnum úr röðum ríkisstjórnar Netanjahús að þar sé talið betra sé að ana ekki út í innrás á Gasa. Hætta sé á því að átökin myndu vinda upp á sig og að stríðið gæti dreift úr sér.

Sérstaklega sé litið til Líbanon og Hezbolla, sem eru hryðjuverkasamtök studd af Íran en þau ráða miklu í Líbanon.

Forsvarsmenn hersins eru sagðir telja frekari undirbúning af hinum góða. Haaretz hefur eftir fyrrverandi þjóðaröryggisráðgjafa að hver dagur sem líði án innrásar hagnist Ísraelum. Loftárásir skaði Hamas á meðan Ísraelar fái tíma til að undirbúa sig.

Hér að neðan má sjá drónamyndband frá AP fréttaveituni sem sýnir eftirmála loftárásar Ísraela á Gasaströndina.