Þing­menn tölu­vert loðnari í svörum um sam­einingu en at­vinnu­lífið

Frétta­stofa sendi þing­mönnum Norð­austur­kjör­dæmis fyrir­spurn í síðustu viku vegna fyrir­hugaðrar sam­einingar mennta­skólanna tveggja. Þing­menn höfðu viku til að svara. Þeir voru spurðir hver af­staða þeirra væri til sam­einingarinnar, hvort þeir væru með eða á móti og hvers vegna þá?

Alls bárust svör frá fjórum þing­mönnum en þing­menn kjör­dæmisins eru tíu. Áður hafði einn þing­mannanna, Sig­mundur Davíð Gunn­laugs­son for­maður Mið­flokksins, gert grein fyrir skoðun sinni á sam­einingunni á Face­book.

Ekki bárust svör frá Sigmundi Davíð, þingmanni Miðflokksins,  Njáli Trausta Friðbertssyni, þingmanni Sjálfstæðisflokksins, Líneik Önnu Sævarsdóttur, þingkonu Framsóknar, Jakobi Frímanni Magnússyni, þingmanni Flokks fólksins, Þórarni Inga Péturssyni, þingmanni Framsóknar og Jódísi Skúladóttur, þingkonu Vinstri grænna

Megin mark­miðið sé sparnaður

Bjark­ey Ol­sen Gunnars­dóttir, þing­flokks­for­maður Vinstri grænna og Logi Einars­son, þing­maður Sam­fylkingarinnar segjast bæði vera mót­fallin fyrir­hugaðri sam­einingu í svörum til frétta­stofu

Áður hefur Sig­mundur Davíð Gunn­laugs­son, for­maður Mið­flokksins, lýst þeirri skoðun sinni á sam­fé­lags­miðlinum Face­book. Hann spyr þar hvort ekki hefði verið heppi­legra að ljúka því að skoða kosti og galla sam­einingar skólanna

Bæði Bjark­ey og Logi segjast í svörum til frétta­stofu hafa á­hyggjur af því að mark­mið breytinganna sé sparnaður

„Það blasir við að megin mark­miðið er sparnaður. Há­leit orð ráð­herra um far­sæld barna og ung­linga virðast nú skipta minna máli,“ segir Logi. Hann hefur einnig tjáð sig um málið á Face­book.

Hann segir að um leið og á­formin hafi verið kynnt hafi verið talað um að nú hæfist vinna við að skoða kosti og galla hug­myndarinnar.

„Ein­hver gæti því sagt að byrjað væri á öfugum enda. Hér er um að ræða tvo stóra en mjög ó­líka skóla, með gjör­ó­líkan skóla­brag.

Bjark­ey segist ekki hlynnt sam­einingunni. Hún telur hana ekki þjóna þeim til­gangi að efla nám eða hafa það fjöl­breyttara.

„Hef líka á­hyggjur af þeim störfum sem tapast ef ætlunin er að spara 300-400 milljónir.“

Ekki allar for­sendur komnar fram

Berg­lind Ósk Guð­munds­dóttir, þing­kona Sjálf­stæðis­flokksins segist hvorki vera með né á móti, þar sem ekki séu allar for­sendur komnar fram í málinu.

„Það þarf að liggja fyrir skýrt hvernig breytingin mun hafa á­hrif á sam­fé­lagið á Akur­eyri og eins hugnast mér ekki að fækka val­kostum unga fólksins til fram­halds­menntunar á lands­byggðinni.“

Hún segir að sér finnist sam­ráðs­leysi við unga fólkið á­mælis­vert. Hún sé þó alltaf hlynnt því að leitað sé leiða til að hag­ræða í opin­berum rekstri þar sem því verður við komið og að iðn-og verk­nám verði eflt til muna á Akur­eyri og að á­skoranir sem birtist í fækkun bók­náms­nema og lé­legrar nýtingar á hús­næði séu leystar.

Ingi­björg Isak­sen, þing­maður og odd­viti Fram­sóknar í Norð­austur­kjör­dæmi, segir mikil­vægt að niður­staða vinnu­hóps um sam­einingu sýni fram á að sam­einingin efli námið og svæðið.

„Ég er mjög hörð á því að niður­stöðurnar verði að sýna fram á það að sam­einingin efli námið og svæðið því ef það kemur ekki fram eftir þessa vinnu þá tel ég ó­lík­legt að ráðist verði í þetta.“

At­vinnu­lífið mót­mælir sam­einingunni

Alls skrifa 25 fyrir­tæki nafn sitt undir til­kynningu þar sem fyrir­hugaðri sam­einingu skólanna tveggja er mót­mælt. Þar á meðal eru Bautinn, Sam­herji og Skógar­böðin á Akur­eyri.

„Mennta­skólinn á Akur­eyri og Verk­mennta­skólinn á Akur­eyri njóta báðir viður­kenningar og virðingar nem­enda og bæjar­búa. Þeir svara um margt ó­líkum en mikil­vægum kröfum nem­enda, sam­fé­lags og at­vinnu­lífs á Akur­eyri og um þá fjöl­breytni og sam­keppni milli skólanna hefur ríkt víð­tæk sátt.“

Segja fyrir­tækin að ó­skiljan­legt sé að Ás­mundur Einar Daða­son, mennta-og barna­mála­ráð­herra vilji nú rjúfa þá sátt með sam­einingu skólanna og að hann full­yrði for­taks­laust með hlið­sjón af niður­stöðu stýri­hóps í hans ráðu­neyti „að með sam­einingu þessara fram­halds­skóla verði til mun öflugri stofnun til að mæta þeim á­skorunum sem skóla­sam­fé­lagið stendur frammi fyrir á komandi árum og vinna að þeim mark­miðum sem sett hafa verið fram í mennta­stefnu.“

„Telji ráð­herrann að sam­legðar­á­hrif fjár­hags­leg og fag­leg myndu nást með sam­einingunni hefði verið eðli­legra að byrja á að láta reyna á þá sam­legð með auknu sam­starfi skólanna og með skýrum mark­miðum sem tækju mið af þeim á­skorunum fram­tíðar sem ráð­herra telur sig greina.“

Á­hyggju­efni sé að stjórn­völd gangi til verka í þessum efnum með þeim hætti að gera fyrir­fram hvorki greiningu á kostum og göllum sam­einingarinnar, né þörfum at­vinnu­lífsins í lands­hlutanum.

„Og hafi heldur ekki haft sam­ráð við helstu hags­muna­aðila á svæðinu um fyrir­hugaðar breytingar. Fyllsta á­stæða er til að ætla að þær breytingar valdi fram­halds­skóla­stiginu á Akur­eyri varan­legum skaða. Óskum við hér með eftir fundi með ráð­herra til þess að fara vand­lega yfir hans rök og okkar.“

Fyrirtækin sem leggja nafn sitt við tilkynninguna:

Skólanefnd

Skólanefnd Menntaskólans á Akureyri leggur til að hugmyndum ráðherra um samruna MA og VMA verði frestað á meðan haldbær rök um ábata liggja ekki ljós fyrir.

„Nefndin leggur til að ráðist verði í ítarlega fýsileikakönnun um kosti og galla samruna skólanna. Fýsileikakönnun þurfi að sýna fram á með óyggjandi hætti að samruni efli bæði gæðastarf og námsframboð en komi einnig til móts við félagslegar þarfir nemenda á fjölbreyttan máta. Nefndin telur nauðsynlegt að til að unnt sé að ná breiðri sátt um framhaldið þurfi sú vinna að liggja fyrir áður en lengra er haldið,“ segir í ályktun nefndarinnar.

Eindregin andstaða kennarafélagsins

Kennarafélag Menntaskólans á Akureyri fundaði föstudaginn 8. september og sendi í kjölfarið frá sér ályktun um eindregna andstöðu viðfyrirhugaðri sameiningu MA og VMA. Ályktunin fylgir hér, orðrétt:

Ályktun kennarafélags Menntaskólans á Akureyri

Kennarafélag Menntaskólans á Akureyri lýsir yfir eindreginni andstöðu við áform mennta- og barnamálaráðherra, Ásmundar Einars Daðasonar, um sameiningu framhaldsskólanna á Akureyri, Menntaskólans og Verkmenntaskólans.

Skýrsla stýrihóps mennta- og barnamálaráðuneytis var unnin án aðkomu almenns starfsfólks og nemenda skólanna sem um ræðir, þrátt fyrir fögur fyrirheit um samráð og samvinnu. Fjölmargar þversagnir og rangfærslur eru í skýrslunni. Hún leiðir í ljós undirliggjandi ástæðu þessara sameiningaráforma, sem er niðurskurður. Meðal þess sem slíkar aðgerðir byggja á er fækkun sálfræðinga, námsráðgjafa og kennara. Fækkun starfsfólks og stækkun nemendahópa samrýmist engan veginn áformum um aukinn stuðning við nemendur í sameinuðum skóla.

MA og VMA eru framúrskarandi skólar, hvor með sína sérstöðu, sögu og menningu. Þeir hafa sett svip sinn á nærsamfélagið um langa tíð og hafa þrifist vel hvor í nábýli við annan undanfarin 40 ár. Skólarnir hafa átt í farsælu samstarfi og vilji er hjá kennarafélagi MA að efla það enn frekar.

Niðurskurðurinn í framhaldsskólakerfinu er nú þegar of mikill. Stutt er síðan þriggja ára stúdentspróf var tekið upp með tilheyrandi sparnaði og auknu álagi á nemendur. Kennarafélag Menntaskólans á Akureyri skorar á ráðherra að falla frá áformum um sameiningu.