Sout­hampton sann­færðir um að geta fengið 50 milljónir fyrir Lavia

Lavia hefur verið orðaður við Liverpool, Chelsea og Arsenal á síðustu vikum en hann kom til Southampton frá Manchester City fyrir aðeins ári síðan sem þá borgaði 10,5 milljónir punda fyrir þjónustu hans.

Talið er að Arsenal og Liverpool séu treg til að punga út þeim 50 milljónum punda sem Southampton vill fá en athygli Lundúnafélagsins síðustu vikurnar hefur öll verið á Declan Rice. Nú, þegar félagaskipti Rice eru svo gott sem í höfn, gæti einbeitingin hins vegar færst yfir á Lavia en Liverpool er einnig áhugasamt og lítur á Lavia sem framtíðarkost aftarlega á miðjunni.

Stefna Liverpool í félagaskiptum sumarsins hefur verið sú að finna rétta leikmenn á réttu verði og fara ekki í stríð við önnur félög sem gætu dregist á langinn. Þá hefur einnig verið skrifað að Liverpool þurfi að losa sig við miðjumann áður en Lavia yrði keyptur og þykir hinn símeiddi Thiago þá vera líklegastur til að hverfa á braut.

Hvað gerir City?

Á sama tíma er Chelsea að vinna í því að kaupa Moises Caicedo frá Brighton en áhugi þeirra á Lavia er enn til staðar jafnvel þó Mauricio Pochettino þurfi að minnka leikmannahóp sinn enn frekar áður en tímabilið hefst.

Forráðamenn Southampton ætla sér ekki að selja Lavia ódýrt og eru á þeirri skoðun að hann gæti orðið einn besti varnarsinnaði miðjumaður í heimi á næstu árum. Ef Lavia verður seldur þá fær Manchester City 20% af kaupverðinu en um það var samið þegar Southampton keypti hann af City á síðasta ári.

Þá hefur verið greint frá því að berist tilboð í Lavia þá fái City alltaf tækifæri á að jafna þau og þá er einnig klásúla í samningi félaganna að City geti keypt hann til baka en hún tekur ekki gildi fyrr en á næsta ári.

Það verður forvitnilegt að fylgjast með framgangi málsins og það gæti vel farið svo að stórliðin þrjú berjist um þjónustu Romeo Lavia sem hefur leikið einn landsleik fyrir belgíska landsliðið.