Seilast langt eftir miða og KSÍ biður fólk að hætta að hringja

Uppselt varð á leikinn um leið og miðasala hófst og ljóst að hægt hefði verið að selja mun fleiri miða en þá 9.800 sem í boði eru á Laugardalsvelli.

Leikurinn fer í sögubækurnar því Cristiano Ronaldo verður fyrsti knattspyrnukarl sögunnar til að spila 200 A-landsleiki, og verða meðal annars 700 Portúgalar á vellinum að fylgjast með því.

Á æfingu portúgalska liðsins í gær var hópur fólks á öllum aldri sem fylgdist með og freistaði þess að fá eiginhandaráritun, en aðgengi að vellinum var lokað og engum hleypt að portúgölsku stjörnunum sem ferjaðar voru inn á leikvanginn í rútu í fylgd lögreglu.

Varar fólk við að kaupa miða af öðrum

Mikið er um það á samfélagsmiðlum að fólk auglýsi eftir miðum á leikinn en Ómar segir fólk einfaldlega verða að sætta sig við að uppselt sé á leikinn, og varar við því að kaupa miða af öðrum en Tix.is.

„Áhuginn er auðvitað bara gríðarlegur, eins og við höfum öll orðið vör við. Þetta er svo sem ekki í fyrsta skipti sem upplifum svona mikla eftirspurn, því svona er þetta þegar það selst strax upp gegn þessum stóru þjóðum, og hingað er mikið hringt þó að það sé löngu búið að tilkynna að það sé uppselt. Þannig að ég vil endilega biðja fólk að hætta að tékka – það eru ekki til fleiri miðar,“ segir Ómar.

Ómar segir KSÍ þó ekki hafa borist nein óvenjuleg tilboð í miða:

„En við höfum heyrt að menn séu tilbúnir að seilast ansi langt til að fá miða og viljum árétta við fólk að fara varlega. Eini aðilinn sem getur selt miða á landsleikinn er Tix, og ef fólk leitar eitthvað annað getur það komið sér í klandur,“ segir Ómar en þekkt er til að mynda að svikahrappar selji sama miða oftar en einu sinni, og að fólk endi með ógildan miða.

Veglegt stuðningsmannasvæði er fyrir utan Laugardalsvöll, með til að mynda veitingasölu, hoppkastölum og knattþrautum, og opnar það klukkan 15.

Ómar hvetur fólk eindregið til að mæta snemma, en á leiknum á laugardag vakti athygli hve langar raðir voru enn þegar leikurinn var að hefjast:

„Það eru eflaust ýmsar skýringar á því. Við höfum reynt að grípa til einhverra ráðstafana hjá okkur, ætlum að breyta aðeins skipulagi varðandi skönnun á miðum og leit í töskum, til að liðka fyrir. En við áréttum við fólk að mæta tímanlega, ekki bara tíu mínútum fyrir leik. Hliðin opna klukkutíma fyrir leik, og því fyrr sem fólk mætir því betra.“

Leikur Íslands og Portúgals hefst klukkan 18:45 á Laugardalsvelli og verður ítarlega fjallað um hann á Vísi í dag og í kvöld.