Fótbolti

„Ó­trú­lega stoltur af strákunum og hvernig þeir svöruðu fyrir tapið gegn Bosníu“

Hjörtur Leó Guðjónsson skrifar
Landsliðsþjálfarinn Arnar Þór Viðarsson var eðlilega ánægður með sína menn eftir 7-0 sigur gegn Liechtenstein í dag.
Landsliðsþjálfarinn Arnar Þór Viðarsson var eðlilega ánægður með sína menn eftir 7-0 sigur gegn Liechtenstein í dag. Alex Nicodim/NurPhoto via Getty Images

„Það er alveg jafn gaman að vinna 7-0 eins og það er leiðinlegt að tapa,“ sagði landsliðsþjálfarinn Arnar Þór Viðarsson eftir öruggan sigur íslenska karlalandsliðsins í fótbolta gegn Liechtenstein í dag.

„Ég er bara ótrúlega stoltur af strákunum og hvernig þeir svöruðu tapinu gegn Bosníu hér í dag,“ bætti Arnar við, en eins og flestir kannski muna mátti íslenska liðið þola 3-0 tap gegn Bosníu síðastliðinn fimmtudag.

„Hann hættir ekkert“

Landsliðsfyrirliðinn Aron Einar Gunnarsson stal fyrirsögnunum í leik dagsins, en þrátt fyrir að leika í miðverði skoraði Aron þrennu, ásamt því að leggja upp eitt mark til viðbótar. Fyrir leikinn hafði hann skorað tvö mörk fyrir íslenska landsliðið, en fjöldi landsliðsmarka jókst um 150 prósent í dag.

„Þó hann hefði ekki skorað neitt þá væri hann enn þá mjög mikilvægur fyrir okkur. Eins og ég sagði á blaðamannafundinum í gær þá er hann rosalega mikilvægur fyrir þennan hóp. Það eru margir efnilegir leikmenn í liðinu sem þurfa að læra hvernig þeir eiga að haga sér innan vallar sem utan og hann er besti kennarinn í því.“

„Það að hann hafi skorað síðan þrjú segir líka svolítið mikið um hann. Hann hættir ekkert. Hann vill næsta og næsa. Ég hrósaði honum mikið fyrir leik, en ég veit ekki hvar ég á að finna orðin til að hrósa honum fyrir þennan.“

Mikilvægt að skora snemma

Það var ljóst frá fyrstu mínútu að liðsmenn Liechtenstein höfðu engan áhuga á því að halda boltanum innan liðsins og íslenska liðið þurfti því að mæta þéttum varnarmúr heimamanna. Davíð Kristján Ólafsson kom íslenska liðinu þó yfir strax á þriðju mínútu með marki sem fór af varnarmanni og Arnar segir að það hafi verið gríðarlega mikilvægt.

„Við töluðum um það að við þyrftum að halda tempóinu háu á boltanum og að við þyrftum að pressa vel og spila okkar leik. Það er voðalega auðvelt að falla í þá gryfju að falla niður á þeirra tempó og spila þeirra leik, en við gerðum það ekki og ég er rosalega ánægður með það.“

„Það að eldri leikmennirnir sem tóku þetta verkefni að sér í fyrri hálfleik að halda þessu tempói og þessari pressu svona hátt þeir búa til aðeins auðveldari leið í seinni hálfleik. En svo þegar við sjáum þessa ungu drengi koma inn í seinni hálfleik þá sjáum við hvað þeir eru rosalega góðir í fótbolta og hvað tempóið er hátt á boltanum. Þeir eru góðir að spila á milli línanna og halda boltanum vel og á réttum augnablikum ráðast þeir á andstæðinginn. Fyrir mér er það góðs viti til fyrir framtíðina.“

„Við þurfum bara að læra af leiknum á fimmtudaginn og taka það sem er gott í dag með okkur og reyna að búa til eina góða köku fyrir júnigluggann.“

Klippa: Arnar Þór Viðarsson eftir sigurinn gegn Liechtenstein

Eðlilegar gagnrýnisraddir eftir tapið gegn Bosníu

Í þessum landsleikjaglugga vann Ísland því einn leik og tapaði einum. Eftir 3-0 tap gegn Bosníu heyrðust ýmsar gagnrýnisraddir, en Arnar segir það eðlilegt eftir jafn slæman leik og Ísland sýndi þá.

„Ég er þannig lagað ánægður með ferðina, en við erum auðvitað hundfúlir með þennan leik á móti Bosníu og eftir þann leik er bara eðlilegt að það sé gagnrýni. En aftur, við verðum bara að læra af því og spýta í lófana og verða enn þá betri sem fyrst.“

Þá segist Arnar taka gagnrýnina að einhverju leyti inn á sig.

„Öll gagnrýni er strembin, að sjálfsögðu. Ég ætla ekkert að standa hérna og ljúga að þér að þetta taki ekkert á. En það er bara hluti mínu sem þjálfari að reyna að standa undir því og halda áfram að vinna þá vinnu sem við lögðum upp með fyrir tveimur árum að reyna að búa til nýtt lið og ná aftur inn á lokamót og nýjum hæðum. Ég er bara bjartsýnn að við náum því, en jú, auðvitað er hundleiðinlegt að fá gagnrýni,“ sagði landsliðsþjálfarinn að lokum.


Tengdar fréttir




Fleiri fréttir

Sjá meira


×