Felix sá rautt í tapi Chelsea gegn Ful­ham

João Félix byrjar lánstíma sinn hjá Chelsea ekki vel þar sem hann fékk beint rautt spjald í sínum fyrsta leik fyrir félagið. Til að bæta gráu ofan á svart þá tapaði Chelsea einnig leiknum gegn nágrönnum sínum í Fulham.

Það hefur ekkert gengið hjá Chelsea undanfarið og vægast sagt farið að hitna undir þjálfara liðsins, Graham Potter. Sá brá á það ráð að setja Felix beint í byrjunarliðið í von um að lánsmaðurinn gæti hjálpað liðinu að komast á beinu brautina.

Það tókst heldur betur ekki og Willian, fyrrverandi leikmaður Chelsea, koma heimamönnum yfir þegar fyrri hálfleikur var hálfnaður, staðan 1-0 í hálfleik. Aðeins voru tvær mínútur liðnar af síðari hálfleik þegar miðvörðurinn Kalidou Koulibaly jafnaði metin fyrir gestina.

Á 58. mínútu fór Felix í glórulausa tæklingu og fékk að líta rauða spjaldið fyrir. Heimamenn nýttu sér liðsmuninn þegar Carlos Vinicius skoraði eftir sendingu frá samlanda sínum Andreas Pereira. Staðan orðin 2-1 og reyndust það lokatölur leiksins.

Fulham fer með sigrinum upp fyrir Liverpool og situr nú í 6. sæti deildarinnar með 31 stig að loknum 19 leikjum. Chelsea er í 10. sæti með 25 stig að loknum 18 leikjum.