Íslenski boltinn

KSÍ breytir leyfis­kerfinu: Fé­lög í efstu deild karla verða að vera með kvenna­lið

Runólfur Trausti Þórhallsson skrifar
Leiknir Reykjavík lék í Bestu deild karla á síðustu leiktíð en tók ekki þátt í Íslandsmóti kvenna í meistaraflokki.
Leiknir Reykjavík lék í Bestu deild karla á síðustu leiktíð en tók ekki þátt í Íslandsmóti kvenna í meistaraflokki. Vísir/Hulda Margrét

Knattspyrnusamband Íslands hefur samþykkt breytingu á leyfiskerfi sambandsins sem hljóðar þannig að lið í Bestu deild karla verða að vera með meistaraflokkslið sem keppir á Íslandsmóti kvenna.

Breytingin var samþykkt af stjórn KSÍ í nóvember á þessu ári og mun taka gildi að fullu árið 2024. Segja má að um nokkuð stóra breytingu sé að ræða. Ásamt því að vera með virkt lið í meistaraflokki á Íslandsmóti kvenna þurfa félög einnig að taka virkan þátt í opinberum mótum fyrir yngri flokka kvenna.

Í reglugerðinni segir: „Leyfisumsækjandinn skal styðja við knattspyrnu kvenna, með verkefnum og starfsemi sem miða að því bæta hana, auka jafnræði, fagmennsku og áhuga.“

Leiknir Reykjavík spilaði í Bestu deild karla síðasta sumar en liðið er sem stendur ekki með meistaraflokks lið kvenna megin. Þá voru þrjú lið í Lengjudeild karla síðasta sumar – Kórdrengir, Vestri og KV – sem voru ekki með lið í meistaraflokki kvenna.

Fótbolti.net greindi fyrst frá. Hægt er að skoða leyfisreglugerð KSÍ með því að smella hérna.

Fréttin hefur verið uppfærð.




Fleiri fréttir

Sjá meira


×