Fótbolti

Varnar­maður Barcelona frá keppni næstu tvo til þrjá mánuðina

Runólfur Trausti Þórhallsson skrifar
Ronald Araújo í baráttunni við hinn danska Kasper Dolberg, leikmann Sevilla.
Ronald Araújo í baráttunni við hinn danska Kasper Dolberg, leikmann Sevilla. EPA-EFE/RAUL CARO

Úrúgvæinn Ronald Araújo, varnarmaður spænska fótboltaliðsins Barcelona, meiddist í landsleikjahléinu og þarf að fara í aðgerð. Hann verður frá næstu tvo til þrjá mánuðina og mun missa af HM.

Hinn 23 ára gamli Araújo er lykilmaður í liði Barcelona sem hefur gengið í gegnum endurnýjun lífdaga síðan Xavi Hernández tók við stjórnartaumunum á síðustu leiktíð. Liðið hefur leikið einkar vel á þessari leiktíð og hefur Araújo verið stór hluti af þeirri velgengni.

Miðvörðurinn hefur byrjað alla leiki Börsunga í deildinni og var í raun aðeins hvíldur í 5-1 sigrinum á Viktoria Plzeň í Meistaradeild Evrópu.

Araújo meiddist á læri í landsleikjahléinu og hefur ákveðið að fara undir hnífinn til að ná fullum bata. Það þýðir að miðvörðurinn spilar ekki meira á þessu ári og mun missa af heimsmeistaramótinu sem fram fer í Katar í nóvember og desember á þessu ári. Hann hefur alls spilað 12 A-landsleiki fyrir þjóð sína en einhver bið verður eftir leik númer þrettán.

Araújo var ekki eini leikmaður Börsunga sem meiddist í landsleikjahléinu en franski varnarmaðurinn Jules Koundé meiddist einnig á læri. Óvíst er hversu lengi hann verður frá.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.