Lægðin heldur að nálgast landið aftur en farin að grynnast

Atli Ísleifsson skrifar 26. september 2022 07:10

Hiti á landinu verður tvö til tíu stig og mildast sunnan heiða. Vísir/Atli

Lægðin sem olli aftakaveðri á austanverðu landinu í gær er nú stödd 350 kílómetra norðaustur af Langanesi og er á leið suðsuðaustur. Lægðin er því heldur að nálgast landið, en á móti kemur að hún er farin að grynnast og missa kraft sinn.

Á vesturhelmingi landsins má reikna með norðlægri eða breytilegri átt, þremur til tíu metrum á sekúndu, en norðvestan, tuttugu til 28 metrum á sekúndu austanlands en að það dragi úr vindi seinnipartinn. Hiti á landinu verður tvö til tíu stig og mildast sunnan heiða.

Frá þessu segir í hugleiðingum veðurfræðings á vef Veðurstofunnar. Þar segir að niðurstaðan af þessu sé að versta veðrið austanlands hafi verið afstaðið í gærkvöldi, en enn vegi búast við norðvestan stormi eða roki á Austfjörðum fram eftir degi.

„Þar lægir síðan svo um munar í kvöld og nótt, en þá hefur áðurnefnd lægð fjarlægst landið, ásamt því að hún heldur áfram að grynnast. Austanlands verður skýjað að mestu í dag og dálítil rigning eða slydda eftir hádegi.

Fyrir vestan land er staddur hæðarhryggur og stjórnar hann veðrinu á vesturhelmingi landsins. Þar er því hæg norðlæg eða breytileg átt og léttskýjað.

Á morgun lægir enn frekar við austurströndina og þá verður komið hið rólegasta veður á landinu öllu. Ekki er búist við úrkomu að neinu ráði. Það verður væntanlega skýjað um landið norðaustanvert, en í öðrum landshlutum ætti eitthvað að sjást til sólar.

Hitinn í dag og á morgun er svipaður: svalast um 2 gráður norðaustanlands, en allt að 10 stig yfir hádaginn sunnan heiða.“

Veðurhorfur á landinu næstu daga

Á þriðjudag: Breytileg átt 3-8 m/s, en norðan strekkingur við austurströndina fyrir hádegi. Víða bjartviðri, en skýjað um landið norðaustanvert. Hiti 3 til 10 stig, mildast sunnanlands.

Á miðvikudag: Hæg suðlæg eða breytileg átt. Lítilsháttar væta á Suður- og Vesturlandi, en þurrt og bjart norðan- og austanlands. Hiti 5 til 10 stig.

Á fimmtudag: Suðaustan 8-15 m/s og rigning með köflum, en þurrt á Norður- og Austurlandi. Hiti 6 til 12 stig.

Á föstudag: Ákveðin austanátt og dálítil rigning, en yfirleitt þurrt á Norður- og Vesturlandi. Hiti breytist lítið.

Á laugardag: Austan- og norðaustanátt og rigning af og til, en bjartviðri á Suður- og Vesturlandi. Hiti 5 til 12 stig, hlýjast sunnan heiða.

Á sunnudag: Austlæg átt. Skýjað austanlands, en léttskýjað vestantil. Hiti breytist lítið.

Veður Óveður 25. september 2022

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.