Nítján dagar í EM: Púllari sem vann sem endurskoðandi og hlustar á gospel-tónlist

Valur Páll Eiríksson skrifar 21. júní 2022 14:02

Guðrún Arnardóttir hefur fest sig í sessi í vörn íslenska landsliðsins. vísir/hulda margrét

Vísir telur niður í Evrópumót kvenna í fótbolta sem fram fer í Englandi í júlí og kynnir leikmenn íslenska landsliðsins. Varnarmaðurinn Guðrún Arnardóttir er önnur í röðinni.

Guðrún er 26 ára gamall miðvörður sem leikur með Rosengård í Malmö í Svíþjóð. Guðrún var fengin til liðsins frá Djurgården eftir að Glódís Perla Viggósdóttir yfirgaf fyrrnefnda liðið fyrir Bayern München í Þýskalandi.

Guðrún hefur smollið inn í lið Rosengård og vann sænska meistaratitilinn með félaginu í október í fyrra. Guðrún lék eitt tímabil með Selfossi í 1. deild árið 2011 áður en hún gekk í raðir Breiðabliks hvar hún lék fram til 2018 þegar hún flutti til Stokkhólms til að leika með Djurgården.

Hún hefur leikið 18 landsleiki fyrir Íslands hönd, þann fyrsta á Algarve-mótinu 2015.

Guðrún fagnaði sænska meistaratitlinum með Rosengård í haust.Twitter @fotbollskanal

Fyrsti meistaraflokksleikur? Var árið 2011 með Selfossi.

Hver hefur kennt þér mest í fótbolta? Svo margir kennt mér svo margt.

Lag sem kemur þér í gírinn fyrir leik? Akkurat núna er það Broke Boy með Malia Civetz

Mætir einhver af fjölskyldu/vinum til að styðja þig á EM? Já, næstum öll stórfjölskyldan og nokkrir vinir.

Hvaða námi eða vinnu hefur þú sinnt (fyrir utan fótbolta)? Vann í endurskoðun hjá EY í eitt og hálft ár, náði mér í BSc gráðu í hagfræði og er núna í mastersnámi við Háskólann á Bifröst.

Í hvernig skóm spilarðu? Puma Future.

Uppáhalds lið í enska? Liverpool.

Uppáhalds tölvuleikur? Spila ekki tölvuleiki en stundum Sudoku í símanum.

Uppáhalds matur? Breytist mikið, akkurat núna er ég með æði fyrir öllu með halloumi.

Fyndnust í landsliðinu? Cecilía.

Gáfuðust í landsliðinu? Verður maður ekki að gefa doktor Elín Mettu og Harvard nemandanum Áslaugu Mundu þetta.

Óstundvísust í landsliðinu? Dagný og Elín Metta skilja yfirleitt ekki mikið svigrúm eftir á klukkunni.

Hvaða lið vinnur EM (ef ekki Ísland)? Ég hef trú á Svíþjóð.

Hvað er skemmtilegast að gera milli æfinga og leikja í landsliðsferðum? Alltaf skemmtilegt að kíkja í smá göngutúr og skoða það sem er í kringum hótelið.

Besti andstæðingur/leiðinlegasti andstæðingur? Leiðinlegast að spila á móti leikmönnum sem kvarta og væla mikið.

Átrúnaðargoð í æsku? Enginn einn sem ég get nefnt.

Nefndu eina staðreynd um þig sem fáir vita: Ég hlusta mikið á gospel tónlist, finnst það bara svo kósý.

Landslið kvenna í fótbolta EM 2022 í Englandi