Erlent

Forseti Alþjóðabankans óttast heimskreppu

Bjarki Sigurðsson skrifar
David Malpass (t.h.) ásamt Svenja Schulze, efnahagsráðherra Þýskalands.
David Malpass (t.h.) ásamt Svenja Schulze, efnahagsráðherra Þýskalands. AP/Bernd von Jutrczenka

David Malpass, forseti Alþjóðabankans, telur heimskreppu yfirvofandi og að fátt geti komið í veg fyrir að svo fari. 

Breska ríkisútvarpið greinir frá því að hann hafi látið þessi orð falla á ráðstefnu sem haldin var í gær. 

Stríðið í Úkraínu, skortur á jarðeldsneyti, matvælaskortur og áhrif kórónuveirunnar í Kína hafi öll haft áhrif á hagkerfið og geti leitt af sér heimskreppu.

„Þegar við lítum á verga landsframleiðslu heimsins (VLF), þá er erfitt að sjá hvernig við forðumst kreppu,“ sagði Malpass á viðburði í Bandaríkjunum í gær.

Mörg ríki hafa lokað á viðskipti við Rússa eftir innrás þeirra í Úkraínu. Verðið á jarðeldsneyti hefur hækkað gífurlega eftir að ríki fóru að leita annað en til Rússlands.

Þróunarlönd finna fyrir miklum matavælaskorti þessa stundina, að hluta til vegna lokunar Rússa á höfnum Úkraínu við Svartahaf. Um 20 milljón tonn af korni bíða til að mynda nú útflutnings í höfnum Úkraínu.

Í mörgum af stærstu borgum Kína, til dæmis í viðskiptaborginni Shanghæ, hefur verið ráðist til sóttvarnaaðgerða í kjölfar nýrra kórónuveirusmita. Aðgerðirnar hafa nú þegar hægt gífurlega á framleiðslu í Kína sem er næst stærsta hagkerfi heims.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×