Innlent

Sér ekki hvað lögreglan hefði getað gert öðruvísi

Margrét Helga Erlingsdóttir skrifar
Sigríður Björk Guðjónsdóttir ríkislögreglustjóri segir lögreglu vera meðvitaða um að forðast kynþáttamörkun í sínum störfum.
Sigríður Björk Guðjónsdóttir ríkislögreglustjóri segir lögreglu vera meðvitaða um að forðast kynþáttamörkun í sínum störfum. Vísir/Egill

Sigríður Björk Guðjónsdóttir, ríkislögreglustjóri, segir að það sé óþolandi að saklaus ungur drengur skyldi hafa orðið fyrir ítrekuðu áreiti af hálfu lögreglu eingöngu vegna uppruna og kynþáttar. Á sama tíma sjái hún ekki hvað lögreglan hefði getað gert öðruvísi því hún hafi verið að leita að hættulegum manni en verið var að leita að gæsluvarðhaldsfanga sem flúði úr héraðsdómi. Lögreglan hefur nýlokið stefnumótun en upp úr henni spruttu einkunnarorðin: Að vernda og virða.

Allsherjar-og menntamálanefnd Alþingis hélt opinn fund í morgun með Sigríði Björk Guðjónsdóttur ríkislögreglustjóra og Ólafi Erni Bragasyni, forstöðumanni Mennta-og starfsþróunarseturs lögreglumanna.

Óskað var eftir fundinum vegna atviks í apríl þegar lögreglan hafði tvívegis afskipti af ungum dreng vegna húðlitar en hann hafði sér ekkert til sakar unnið. Arndís Anna Kristínardóttir Gunnarsdóttir þingmaður Pírata óskaði eftir fundinum og spurði Sigríði hvort atvikið gæti flokkast sem kynþáttamörkun eða það sem nefnist á ensku „Racial profiling“.

Sigríður svaraði því til að það hefði ekki verið lögreglan sem hefði valið þá sem afskipti voru höfð af heldur hafi hún verið aðf ylgja eftir ábendingum frá almenningi. Því geti hún ekki skrifað upp á að þetta tilvik sé dæmi um kynþáttamörkun en lögreglan sé þó vakandi fyrir slíku í sínum störfum. Hún segir að misskilningur hafi verið í fjölmiðlaumfjöllun af málinu.

„Þeir áttu aldrei samskipti við drenginn, ræddu aldrei við hann. Þeir eru einmitt þjálfaðir í að bera kennsl á fólk sem þýðir að þeir sáu alveg um leið að þetta var ekki maðurinn sem verið var að leita að. Þeir gengu í fyrra tilvikinu út í enda á strætisvagni, sneru við og fóru út. Þetta er engu að síður mjög „trámatískt“ fyrir drenginn,“ segir Sigríður.

Lögreglan sé þjónustustofnun og hún þurfi að gera betur í að hlusta á samfélagið. Lögreglan hafi nýlokið stefnumótun en upp úr henni hafi sprottið ný einkunnarorð: Að vernda og virða.

„Það er raunverulega óþolandi að það skuli vera saklaust ungmenni sem þarna á í hlut sem verður fyrir þessari „trámatísku“ reynslu jafnvel þótt lögreglan hafi verið að sinna sínu starfi, ég er algjörlega sammála því og við þurfum að reyna að finna einhverjar leiðir til þess að vinna með það þó ég sjái ekki hvernig við hefðum getað gert þetta öðruvísi í þessu tilviki þá eru fleiri tilvik sem munu koma upp í framtíðinni,“ sagði Sigríður Björk Guðjónsdóttir ríkislögreglustjóri.


Tengdar fréttir

Lögregla hafi ekki átt annarra kosta völ: „Við erum að leita að hættulegum manni“

Ríkislögreglustjóri segist ekki geta útilokað fordóma í lögreglunni en telur lögreglu ekki hafa sýnt fram á rasisma í tengslum við leitina að strokufanga. Hún segir lögreglu ekki hafa val um að fylgja eftir ábendingum í leit að eftirlýstum manni og að viðbrögð lögreglu hafi verið rétt. Henni þyki leitt að ungur maður hafi dregist inn í málið og að verið sé að ræða hvernig bæta megi aðgerðir í framhaldinu. 



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.