Fótbolti

Vonast eftir kraftaverki hjá Sveindísi fyrir framan metfjölda

Sindri Sverrisson skrifar
Sveindís Jane Jónsdóttir lék 90 mínútur á Camp Nou í síðustu viku, í undanúrslitum sterkustu félagsliðakeppni heims.
Sveindís Jane Jónsdóttir lék 90 mínútur á Camp Nou í síðustu viku, í undanúrslitum sterkustu félagsliðakeppni heims. Getty

Áhorfendametið hjá Wolfsburg verður slegið rækilega á morgun þegar liðið tekur á móti Barcelona í seinni leik liðanna í undanúrslitum Meistaradeildar kvenna í fótbolta.

Sveindís Jane Jónsdóttir var í byrjunarliði Wolfsburg á Camp Nou í síðustu viku þar sem Barcelona vann stórsigur, 5-1. Því er afar langsótt að Wolfsburg komist áfram í úrslitaleikinn, ekki síður þegar haft er í huga að Evrópumeistarar Barcelona hafa unnið 45 keppnisleiki í röð:

„Við viljum gera allt sem við getum og við gætum, sérstaklega með stuðningsmennina á bakvið okkur, náð að framkalla kraftaverk,“ sagði þýska landsliðskonan Felicitas Rauch sem leikur með Wolfsburg.

„Andinn í liðinu er þannig að við höfum trú allt til enda. Við ætlum okkur svo sannarlega að vinna,“ sagði Rauch.

Búist er við um það bil 20.000 áhorfendum í Wolfsburg á morgun en metið á heimaleik hjá liðinu er 12.464 manns, frá árinu 2014.

Yfir 90.000 manns sáu Sveindísi í síðustu viku þegar Wolfsburg mætti Barcelona á Camp Nou.Getty/Pedro Salado

Áhorfendametið verður því slegið með miklum mun þrátt fyrir að fjöldinn sé ekki nálægt þeim 91.648 manns sem mættu á fyrri leikinn á Camp Nou.

Leikur Wolfsburg og Barcelona hefst klukkan 16 á morgun og streymi DAZN frá leiknum verður að finna á Vísi.




Fleiri fréttir

Sjá meira


×