Napoli mis­steig sig í titil­bar­áttunni

Napoli er í harðri baráttu við AC og Inter Milan á toppi Serie A, liðið þurfti því nauðsynlega á sigri að halda gegn Cagliari í kvöld. Leikurinn var hins vegar frekar lokaður framan af og staðan markalaus er flautað var til loka fyrri hálfleiks.

Gaston Pereiro kom heimamönnum í Cagliari yfir þegar tæp klukkustund var liðin og útlitið því ekki bjart fyrir gestina.

Luciano Spalletti brást við með þrefaldri skiptingu á 67. mínútu og sú átti eftir að hafa áhrif fyrir Napoli. Varamaðurinn Victor Osimhen jafnaði nefnilega metin á 87. mínútu og þar við sat, lokatölur 1-1. 

Napoli er því áfram í 3. sæti Serie A, nú með 54 stig líkt og Inter sem á leik til góða. AC Milan trónir á toppnum með 56 stig eftir að hafa spilað jafn marga leiki og Napoli.