Hegðun í stúkunni fer versnandi | Neysla kókaíns vanda­­­mál

Það verður seint sagt að enskt stuðningsfólk hafi hagað sér vel í gegnum tíðina. Fótboltabullur voru tíðir gestir í fangaklefum hér áður fyrr sem og reglulegt fréttaefni. Enskar boltabullur þá sérstaklega þegar á stórmót var komið.

Þó fótboltabullur séu enn til staðar þá skar enska knattspyrnusambandið upp herör gegn boltabullum þar í landi skömmu eftir aldamót. Það gekk betur en nokkrum hefði grunað og hefur enskt stuðningsfólk hagað sér sómasamlega að mestu, það er áður en Covid-19 skall á heimsbyggðinni.

Eftir það virðist allt hafa farið fjandans til og þarf ekki nema benda á ástandið í kringum úrslitaleik Evrópumótsins sem fram fór í Lundúnum síðasta sumar.

Á íþróttavefnum The Athletic má nú finna ítarlega grein þar sem farið er yfir gríðarlega aukningu ofbeldismála og atvika þar sem lögregla eða öryggisverðir þurfa að hafa afskipti af stuðningsfólki enskra knattspyrnuliða.

Svo virðist sem stuðningsfólk hafi einfaldlega misst vitið á meðan spilað var fyrir luktum dyrum vegna faraldursins. Ástandið er sérstaklega slæmt í ensku B- (Championship) og E-deildinni (National League) en þar hefur atvikum fjölgað um 58 og 56 prósent.

Alls hefur 901 handtaka átt sér stað á knattspyrnuleikjum Englands það sem af er leiktíðinni. Í febrúar árið 2020 höfðu 547 handtökur átt sér stað þá leiktíðina svo er að ræða rúmlega 60 prósent aukningu milli ára. 

Ekki þarf að leita langt yfir skammt eftir slíku atviki en í leik Nottingham Forest og Leicester City í enska FA-bikarnum réðst stuðningsmaður gestanna á leikmenn heimaliðsins er þeir fögnuðu einu marka sinna í leiknum. 

Stuðningsmaðurinn var handtekinn og verður leiddur fyrir dómara á næstu dögum.

Samkvæmt Athletic virðist sem fótboltabullur Englands séu vaknaðar af værum blundi. Helst er um að ræða karlmenn, á aldrinum 18 til 25 ára, sem mæta á leiki eftir að hafa fengið sér vel í nös af kókaíni.

Sögur eru af klósettum á leikvöngum sem eru svo yfirfull af kókaínleifum að lögregluhundar vita ekki hvar þeir eigi að byrja að þefa. Neysla kókaíns virðist eingöngu vera að aukast á Englandi öllu og er því ekki um að ræða atvik sem eru bundin við knattspyrnuleiki. 

Það virðist þó fara styttast í að enska knattspyrnusambandið og félög þess fari að taka enn harðar á málunum en hefur verið gert til þessa. Ef ekki virðist sem stuðningsfólk geti skóflað í nösina á sér hvar og hvenær sem er.