Enski boltinn

Segir Man. Utd úr leik í kapphlaupinu um Haaland

Sindri Sverrisson skrifar
Erling Braut Haaland er þriðji markahæstur í þýsku deildinni í vetur með 15 mörk í aðeins 13 leikjum.
Erling Braut Haaland er þriðji markahæstur í þýsku deildinni í vetur með 15 mörk í aðeins 13 leikjum. Getty/Christian Charisius

Manchester United hefur gefist upp á að reyna að fá norska framherjann Erling Braut Haaaland og flest bendir til þess að hann fari til Real Madrid í sumar.

Þetta fullyrðir ESPN í dag og segist hafa fyrir því heimildir að United sé úr leik í kapphlaupinu um markaskorarann mikla.

Haaland er samningsbundinn þýska félaginu Dortmund en klásúla er í samningnum sem gerir hann falan fyrir 75 milljónir evra í sumar. Afar líklegt þykir því að þessi 21 árs gamli leikmaður yfirgefi Dortmund eftir tímabilið.

United reyndi að fá Haaland þegar hann yfirgaf FC Salzburg en hann fór þá til liðs við Dortmund, í janúar 2020.

Forráðamenn United hafa lengi verið með Haaland í sigtinu og það virtist geta hjálpað félaginu að landi hans, Ole Gunnar Solskjær, væri við stjórnvölinn. Svo reyndist þó ekki vera og samkvæmt ESPN hefur brottrekstur Solskjærs ekkert að gera með það að United þurfi að leita annað eftir markaskorara.

United ekki í stöðu til að telja Haaland hughvarf

Heimildamenn ESPN segja að United, sem á enn eftir að finna nýjan knattspyrnustjóra en er með Ralf Rangnick sem bráðabirgðastjóra út leiktíðina, sé ekki í stöðu til þess núna að geta fengið Haaland til að snúast hugur. Hann stefni til spænsku höfuðborgarinnar til að spila fyrir Real Madrid.

ESPN sagði frá því í desember að markmið Real væri að búa til nýtt ofurlið með því að fá bæði Haaland og svo Kylian Mbappé frá PSG næsta sumar. Manchester City er hins vegar tilbúið að berjast fyrir því að fá Haaland og ljóst að enska félagið getur boðið betri launapakka en Real sem þó er líklegra til að landa Haaland eins og fyrr segir.

Heimildamenn ESPN segja að ráðgjafar Haalands séu hrifnir af því sem Rangnick hafi afrekað hjá fyrri félögum sem hann hafi starfað hjá, en ljóst sé að United sé í umbreytingafasa og óvíst að liðið verði með í Meistaradeild Evrópu á næstu leiktíð. Það geri hina 20-földu Englandsmeistara minna spennandi.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.