Gripið til aðgerða fyrir veitingahús og tónlistarfólk

Heimir Már Pétursson skrifar 18. janúar 2022 13:15

Börum hefur verið gert að loka alveg í yfirstandandi sóttvarnaaðgerðum. Vísir/Vilhelm

Ríkisstjórnin samþykkti í morgun frumvarp um aðgerðir til að bæta veitingastöðum tekjutap vegna sóttvarnaaðgerða. Styrkirnir miðaðst við stöðugildi og geta hæstir orðið tólf milljónir króna. Þá eru aðgerðir í undirbúningi vegna tekjutaps fólks í sviðslistum.

Frumvarp Þórdísar Kolbrúnar R. Gylfadóttur utanríkisráðherra og staðgengills fjármálaráðherra um aðgerðirnar var samþykkt í ríkisstjórn í morgun og verður lagt fyrir þingflokka stjórnarflokkanna í dag. Aðgerðirnar eru til að styðja við veitingastaði sem gert hefur verið að loka vegna yfirstandandi sóttvarnaaðgerða.

Þórdís Kolbrún R. Gylfadóttir utanríkisráðherra lagði frumvarpið fram í ríkisstjórn sem staðgengill Bjarna Benediktssonar fjármálaráðherra sem er í leyfi.Vísir/Vilhelm

„Þetta eru í raun styrkir fyrir aðila í veitingarekstri með vínveitingaleyfi sem hafa orðið fyrir tekjufalli vegna skerts opnunartíma,“ segir Þórdís Kolbrún.

Áður hafi verið miðað við að lágmarki 40 prósenta tekjufall en það verði fært niður í 20 prósent. Styrkirnir breytist eftir tekjufallinu allt frá 20 prósentum upp í 60 prósent og væru hugsaðir til greiðslu launa.

Þessar tilteknu aðgerðir kosta ríkissjóð umtalsverðar upphæðir.

„Það er eins og venjulega aðeins erfitt að meta umfangið. Þetta geta verið allt að þrír milljarðar. Mat ráðuneytisins er að það sé líklegra að vera í kringum einn og hálfur,“ segir Þórdís Kolbrún.

Styrkur geti ekki verið hærri en 500 þúsund krónur á hvert stöðugildi ef tekjufall væri frá 20 prósentum upp í sextíu prósent en 600 þúsund á hvert stöðugildi ef tekjufallið væri meira en 60 prósent. Hámarksstyrkur á hvert fyrirtæki geti ekki verið hærri en tíu til tólf milljónir króna.

Aðgerðirnar bætast við seinkun gjalddaga opinberra gjalda sem Alþingi samþykkti í gær. Að auki er hópur á vegum stjórnvalda að skoða hvort grípa þurfi til enn frekari aðgerða til stunings fyrirtækjum.

Katrín Jakobsdóttir forsætisráðherra segir stjórnvöld vera að skoða frekari stuðning við ferðaþjónustu- og viðburðafyrirtæki.Vísir/Vilhelm

Katrín Jakobsdóttir forsætisráðherra segir stjótnvöld einnig vera að skoða frekari styrki til ferðaþjónustuaðila og viðburðahaldara. Lilja Alfreðsdóttir menningar- og viðskiptaráðherra hafi sömuleiðis kynnt viðbótarframlög á fjórða hundruð milljónir króna í ýmsa sjóði vegna sviðslista og tónlistar.

Erum við þá að tala um tónlistarmenn, eins popptónlistarmenn og aðra sem hafa farið mjög illa út úr faraldrinum og ekki getað haldið tónleika í bráðum tvö ár flestir?

„Það er verið að hugsa um þennan hóp já. Það er verið að reyna að beina fjármunum í ólíka sjóði þannig að það gagnist sem flestum,“ segir Katrín Jakobsdóttir.

Faraldur kórónuveiru (COVID-19) Veitingastaðir Ríkisstjórn Katrínar Jakobsdóttur

Tengdar fréttir

Vilja skoða fleiri kosti og krefja Willum svara

Félag atvinnurekenda hefur sent Willum Þór Þórssyni heilbrigðisráðherra erindi þar sem settar eru fram sex spurningar til ráðherra um hvaða valkostir hafi verið til skoðunar áður en tekin var ákvörðun um að herða sóttvarnaaðgerðir stórlega í lok síðustu viku.

18. janúar 2022 12:58

Ráðherrar skýri nýjar sóttvarnaraðgerðir samdægurs

Þingflokkur Viðreisnar hefur farið fram á að ráðherrar gefi Alþingi skýrslu, samdægurs, eða eins fljótt og auðið er, eftir að sóttvarnaraðgerðir eru kynntar eða framlengdar af hálfu stjórnvalda.

17. janúar 2022 10:43

Fengu tiltal frá lögreglu vegna ruglingslegra sóttvarnareglna

Lögreglan á Suðurlandi heimsótti Gróðurhúsið í Hveragerði fyrr í kvöld vegna sóttvarnareglna sem höfðu verið brotnar inni í mathöllinni á staðnum. Eigandi Gróðurhússins segir að bætt verði úr sóttvörnum á staðnum fyrir morgundaginn en reglur hafi verið óskýrar þegar þær breyttust á miðnætti í gær.

15. janúar 2022 20:19

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.