Juventus nálgast Meistaradeildarsæti | Atalanta missteig sig

Moise Kean kom Juventus yfir gegn Cagliari fimm mínútum fyrir hálfleik og staðan var því 1-0 þegar gengið var til búningsherbergja. 

Federico Bernardeschi tvöfaldaði forystu heimamanna á 83. mínútu og tryggði Juventus þar með 2-0 sigur.

Juventus er nú í fimmta sæti ítöslku deildarinnar með 34 stig eftir 19 leiki, fjórum stigum á eftir Atalanta sem situr í fjórða sæti sem gefur keppnisrétt í Meistaradeild Evrópu. Cagliari situr hins vegar í næst neðsta sæti með tíu stig.

Þá missteig Atalanta sig í toppbaráttunni þegar liðið gerði markalaust jafntefli gegn fallbaráttuliði Genoa.

Sigur hefði komið Atalanta upp í annað sæti deildarinnar, en þess í stað halda liðsmenn Atalant upp á jólin í fjórða sæti deildarinnar.