Tónlist

Dívur frá Detroit á toppnum

Tinni Sveinsson skrifar
Dames Brown er tríó frá Detroit-borg.
Dames Brown er tríó frá Detroit-borg.

Tónlistarþátturinn PartyZone hefur sett saman lista yfir 30 bestu danstónlistarlög október og nóvembermánaðar. Á toppnum trónir Dames Brown, tríó söngdíva frá Detroit.

„Lagið með Dames Brown er soul-skotin house-sprengja. Það er unnið með listamönnunum Amp Fiddler og Andrés og hefur vakið mikla athygli. Annars er greinilegt að það er komin smá útgáfusprengja. Það eru frábærar plötur og lög að koma út núna síðustu vikur ársins,“ segir Helgir Már Bjarnason, einn umsjónarmanna PartyZone.

Nýr þáttur af PartyZone fer í loftið hér á Vísi á föstudögum og er hann síðan aðgengilegur á helstu hlaðvarpsveitum og á Mixcloud-rás þáttarins. 

Til þess að finna listann fyrir október og nóvember var leitað til plötusnúða bæjarins og helstu lista tónlistarpressunnar skoðaðir.

Klippa: Party Zone listinn top 30

Þungskýjað og haustlegt

„Á listanum eru gamlar og nýjar hetjur úr teknó og húsgeiranum. Masters At Work eru mættir með nýtt lag, Booka Shade með nýja plötu og Bonobo með nýtt og afar þungskýjað, haustlegt efni. Þarna eru stórir klúbbaslagarar frá Maceo Plex og engum öðrum en David Morales. Meðal nýrra og feskra listamanna má nefna Fatima Yamaha sem vinnur með gamla 80s slagarann Solid í góðar 12 mínútur og úr verður dansgólfatryllir sem á eftir að gera það mjög gott næstu vikur og mánuði,“ segir Helgi.

Múmía af Tunglinu

„Múmía þáttarins er topplag PartyZone listans fyrir 30 árum síðan. Listi sem kynntur var í þættinum á Útrás á laugardagskvöldi í nóvember 1991.

Þeir sem sóttu skemmtistaðinn Tunglið á þeim árum þekkja þessa klassík vel. Þetta lag slæddist líka inná reifin sem haldin voru á hinum ýmsu stöðum í úthverfum borgarinnar og voru auglýst grimmt í þættinum.“




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.