Fótbolti

Xavi tekinn við Barcelona

Ingvi Þór Sæmundsson skrifar
Xavi lyftir Meistaradeildarbikarnum eftir síðasta sinn leik með Barcelona, gegn Juventus í úrslitaleik Meistaradeildar Evrópu 6. júní 2015.
Xavi lyftir Meistaradeildarbikarnum eftir síðasta sinn leik með Barcelona, gegn Juventus í úrslitaleik Meistaradeildar Evrópu 6. júní 2015. getty/Paul Gilham

Xavi er tekinn við Barcelona. Al Sadd, félag Xavis í Katar, hefur staðfest þetta.

Xavi, sem er 41 árs, tekur við Barcelona af Ronald Koeman sem var rekinn eftir 1-0 tap fyrir Rayo Vallecano í spænsku úrvalsdeildinni í síðustu viku. Sergi hefur stýrt Börsungum í síðustu tveimur leikjum þeirra.

Xavi er í guðatölu hjá Barcelona enda vann hann allt sem hægt var að vinna með félaginu og var fyrirliði þess um tíma. Xavi er næstleikjahæstur í sögu Barcelona með 767 leiki.

Eftir að hafa unnið þrennuna með Barcelona 2015 fór Xavi til Al Sadd. Þar lék hann í fjögur ár og tók svo við liðinu 2019. Undir hans stjórn vann Al Sadd einn meistaratitil og tvo bikarmeistaratitla í Katar.

Talið er að Barcelona hafi þurft að greiða Al Sadd um fimm milljónir evra til að losa Xavi undan samningi hjá félaginu.

Barcelona mætir Celta Vigo í spænsku úrvalsdeildinni á morgun. Ólíklegt þykir að Xavi stýri liðinu í þeim leik. Hann verður líklega á hliðarlínunni í fyrsta sinn þegar Barcelona mætir Espanyol í Katalóníuslag eftir landsleikjahléið.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.