Íslenski boltinn

Ferðuðust til tunglsins til að spila leiki íslenska fótboltasumarsins

Sindri Sverrisson skrifar
KA-menn ferðuðust um 8.500 kílómetra í sumar en Blikar þurftu lítið að ferðast.
KA-menn ferðuðust um 8.500 kílómetra í sumar en Blikar þurftu lítið að ferðast. vísir/Hulda Margrét

Á meðan að KA-menn þurftu að ferðast samtals um 8.500 kílómetra til að spila leiki sína í efstu deild karla í fótbolta í sumar þurftu Íslandsmeistarar Víkings aðeins að ferðast 1.000 kílómetra. Liðin á Austfjörðum þurftu þó að ferðast lengst allra þetta fótboltasumar.

Þetta kemur fram í forvitnilegri samantekt Byggðastofnunar. Þar segir að samtals hafi íslensk fótboltalið í meistaraflokki karla og kvenna ferðast ríflega 413 þúsund kílómetra til að spila deildarleiki á útivöllum og komast aftur heim, á nýafstöðnu keppnistímabili. Á það er bent að það jafngildi ferð aðra leið til tunglsins og rúmlega það.

Í tölum Byggðastofnunar er gert ráð fyrir því að liðin ferðist akandi í leiki og að þau spili sína heimaleiki alltaf á sínum aðalheimavelli.

Mest er um ferðalög í 2. og 3. deild karla, og 2. deild kvenna, þar sem liðin dreifast vel um landið.

Í efstu deild karla var einsleitnin ansi mikil hvað varðar staðsetningu liða og einu ferðalögin sem kröfðust meira en klukkutíma aksturs voru vegna leikja KA. Í tölum Byggðastofnunar er auk þess ekki horft til þess að KA þurfti fjórum sinnum að ferðast til Dalvíkur til að spila heimaleiki.

Í efstu deild kvenna voru hins vegar Tindastóll, Þór/KA, ÍBV, Selfoss og Keflavík öll utan höfuðborgarsvæðisins.

Unnu 2. deild og ferðuðust mest allra liða á Íslandi

Á toppnum yfir ferðalög í sumar, líkt og í 2. deild kvenna, endaði sameinað lið Fjarðabyggðar, Hattar og Leiknis Fáskrúðsfirði. Hér má sjá tíu ferðaglöðustu liðin samkvæmt lista Byggðastofnunar:

Liðin tíu sem ferðuðust mest í sumar:

  1. Fjarðabyggð/Höttur/Leiknir – í 2. deild kvenna - 12.020 km.
  2. Leiknir Fáskrúðsfirði – í 2. deild karla – 11.336 km.
  3. Fjarðabyggð í 2. deild karla – 11.336 km.
  4. Einherji á Vopnafirði í 2. deild kvenna – 10.852 km.
  5. Einherji á Vopnafirði í 3. deild karla – 10.602 km.
  6. Höttur/Huginn á Egilsstöðum og Seyðisfirði í 3 deild karla – 10.596 km.
  7. Vestri á Ísafirði í 1. deild karla – 9.584 km.
  8. Þór Akureyri í 1. deild karla – 9.210 km.
  9. Sindri á Hornafirði í 3. deild karla – 9.160 km
  10. Völsungur á Húsavík í 2. deild karla – 8.538 km.

Hér að neðan má svo sjá færslu Byggðastofnunar í heild sinni.




Fleiri fréttir

Sjá meira


×