Innlent

Bjarni telur eðlilegt að stokka upp ráðuneyti nái flokkarnir saman

Heimir Már Pétursson skrifar
Bjarni Benediktsson er bjartsýnn á að stjórnarflokkarnir nái saman um áframhaldandi samstarf. Ef það takist komi vel til greina að stokka upp í ráðuneytunum á milli flokkanna.
Bjarni Benediktsson er bjartsýnn á að stjórnarflokkarnir nái saman um áframhaldandi samstarf. Ef það takist komi vel til greina að stokka upp í ráðuneytunum á milli flokkanna. Vísir/Vilhelm

Formaður Sjálfstæðisflokksins telur líklegt að stokkað verði upp í ráðuneytum milliflokka ef stjórnarflokkunum tekst að ná saman um nýjan stjórnarsáttmála. Formenn flokkanna gefa sér fram yfir helgi til að kanna grundvöll til áframhaldandi samstarfs og ræða ekki við aðra á meðan.

Formenn síðustu ríkisstjórnar funduðu tvívegis í dag um grundvöll til myndunar nýrrar ríkisstjórnar. Sigurður Ingi Jóhannsson formaður Framsóknarflokksins segir að eftir fjögurra ára samstarf viti formennirnir hvað þurfi að ræða sérstaklega og vikan ætti að duga til þess.

„Já ég myndi halda að það væri skynsamleg tímalína í þessu. Af því að það er óþarfi að taka of langan tíma ef þess þarf ekki,“ segir Sigurður Ingi.

Stjórn sömu flokka hefði ríflegan 37 þingmanna meirihluta. Það er þó mögulegt að mynda aðrar þriggja flokka stjórnir Framsóknar- og Sjálfstæðisflokks án þátttöku Vinstri grænna.

Hægt væri að mynda þrjátíu og fimm þingmanna stjórn með Flokki fólksins, þrjátíu og fjögurra með Viðreisn og þrjátíu og tveggja með Miðflokknum. Þá væru að minnsta kosti tvær fjögurra flokka stjórnir mögulegar án Sjálfstæðisflokksins.

Sigurður Ingi segist ekki hafa sett fram kröfu um forsætisráðherrastólinn í yfirstandandi undirbúningsviðræðum.

„Nei, við höfum sagt að við hefjum ekki þetta samtal með því að setja stólinn fyrir dyrnar í bókstaflegri merkingu á nokkurn hátt,“ segir formaður Framsóknarflokksins.

Það fór vel á með oddvitum stjórnarflokkanna á kosningavöku Stöðvar 2, Vísis og Bylgjunnar eftir að fyrstu tölur höfðu borist í kosningunum á laugardag.Vísir/Vilhelm

Bjarni Benediktsson tekur undir þetta en útilokar ekki uppstokkun ráðuneyta á milli flokkanna nái þeir saman um málefnin.

„Já, já mér finnst allt vera uppi á borðum. Við erum búin að klára kjörtímabilið. Núna hefst nýtt upphaf. Þannig að það getur vel verið að það verði breytingar,“ segir Bjarni.

Flokkarnir væru einnig spenntir fyrir framtíðinni. Hann væri bjartsýnn á að þeir næðu saman.

„Við vitum öll að það voru ýmis mál sem reyndi á í samstarfinu sem við þurfum aðeins að ræða. Það gagnast engum að klessa bara aftur á vegg með slík mál,“ segir Bjarni.

Katrín Jakobsdóttir segir skipan ráðherraembætta ekki rædda fyrr en búið væri að afgreiða málefnin en hún hafi lýst sig reiðubúna til að gegna forsætisráðherraembættinu áfram.Vísir/Vilhelm

Katrín Jakobsdóttir formaður Vinstri grænna segir stefnt að skýrari mynd í lok vikunnar varðandi afgreiðslu ágreiningsmála og línur fyrir framtíðina. Þá fyrst komi að verkaskiptingunni.

Er það úrslitaatriði í þínum huga að þú verðir áfram forsætisráðherra?

„Ég hef bara lýst mig reiðubúna til að sinna því hlutverki. En það er eitthvað eins og ég segi sem við ræðum síðar í þessu ferli.“

En þú hefðir ekkert á móti því?

„Nei, nei,“ sagði Katrín og hló að ágengni fréttamanns.

Formennirnir staðfestu allir að þeir væru ekki í neinum viðræðum við aðra flokka á meðan á viðræðum þeirra í milli stæði. Sigurður Ingi sagði að þau hefðu öll lýst því yfir fyrir kosningar að þau myndu ræða saman ef flokkarnir fengju til þess meirihluta. Það væru þau að gera nú eftir að hafa fengið til þess umboð frá þjóðinni.


Tengdar fréttir

For­sætis­ráð­herra­stóllinn ekki stóra málið

Stóra málið í samtölum formanna stjórnarflokkanna þriggja er ekki hver hreppir forsætisráðherrastólinn, að sögn Sigurðar Inga Jóhannsson, formanns Framsóknarflokksins. Samstarf undir forystu Katrínar Jakobsdóttur hafi verið gott en ný hefjist nýtt kjörtímabil.

Katrín til í for­sætis­ráð­herra­stólinn á­fram

Katrín Jakobsdóttir formaður Vinstri grænna er til í að gegna embætti forsætisráðherra áfram. Það sé hins vegar ekki komið að því í viðræðum fráfarandi stjórnarflokka að skipta með sér embættum. Fyrst þurfi að kanna grundvöll fyrir áframhaldandi samstarfi og það gangi vel.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.