Páfi hafnar fréttum um að hann ætli að segja af sér

Kjartan Kjartansson skrifar 1. september 2021 10:09

Frans páfi er 84 ára gamall. Ítalskt dagblað hélt því fram að hann gæti sagt af sér í kringum 85 ára afmælið í desember. Vísir/EPA

Frans páfi segir ekkert hæft í fréttum ítalskra fjölmiðla um að ætli að segja af sér á næstunni. Hann lifi nú fullkomulega eðlilegu lífi eftir ristilaðgerð sem hann gekkst undir í júlí.

Ítalska dagblaðið Libero hélt því fram að páfakjör væri á næsta leiti því Frans páfi hefðu rétt um að segja af sér, mögulega í kringum 85 ára afmæli sitt í desember. Páfi hafnaði því alfarið í viðtali við spænsku útvarpsstöðina COPE. Fullyrti hann að það hefði ekki svo mikið sem hvarflað að honum að segja af sér.

Þá segist hann annar maður eftir ristiluppskurðinn í júlí. Hann lá á sjúkrahúsi í ellefu daga eftir aðgerðina en hann hafði þjáðst af þrengslum í ristli. Nú segist hann geta borðað allt sem hann gat ekki gert áður.

Þakkaði hann karkyns hjúkrunarfræðingi í Páfagarði fyrir að sannfæra sig um að fara í aðgerð frekar en að halda áfram meðferð með sýklalyfjum og öðrum lyfjum.

„Hann bjargaði lífi mínu,“ sagði Páfi, að sögn Reuters-fréttastofunnar.

Til að sýna fram á að hann ætli sér alls ekki að láta af embætti lýsti Frans ferðadagskrá næstu mánaða. Hann stefnir meðal annars á að mæta á loftslagsráðstefnu Sameinuðu þjóðanna í Glasgow í nóvember.

Páfagarður Trúmál

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.