Fótbolti

Liðsfélagi Ögmundar handtekinn ásakaður um nauðgun

Valur Páll Eiríksson skrifar
Semedo er borinn þungum ásökunum.
Semedo er borinn þungum ásökunum. John Berry/Getty Images

Portúgalinn Rúben Semedo, sem er liðsfélagi Ögmunds Kristinssonar hjá Olympiakos í Grikklandi, hefur verið handtekinn af lögregluyfirvöldum í Grikklandi. 17 ára stúlka segir hann hafa nauðgað sér.

Grískir fjölmiðlar segja frá því að stúlkan hafi greint lögreglunni frá málinu á dögunum. Hún hafi sagt lögreglu að hún hafi hitt Semedo á bar þar sem hann keypti handa henni drykki. Hann hafi svo keyrt hana heim til sín hvar hann hafi nauðgað henni. 

Semedo var handtekinn af lögreglu og mun mæta fyrir dómara í dag, þriðjudag. Annar maður er sagt hafa átt hlut að máli en sá hefur ekki verið handtekinn.

Stevros Georgopoulos, lögmaður Semedo, segir ekkert til í ásökunum stúlkunnar.

Semedo var orðaður við enska úrvalsdeildarfélagið Wolves í sumar en þau skipti gengu ekki upp þar sem hann fær ekki atvinnuleyfi á Bretlandi sökum fyrri glæpa sinna.

Semedo játaði sök er hann var ákærður fyrir mannrán, vopnað rán, líkamsárás og vörslu ólöglegs skotvopns fyrir spænskum dómstólum árið 2018. Hann var ekki fangelsaður fyrir brot sín, heldur sektaður um 46 þúsund evrur og bannað að snúa aftur til Spánar næstu átta árin.

Hann yfirgaf í kjölfarið spænska liðið Villarreal sem hann var samningsbundinn á þeim tíma og lék með Rio Ave í heimalandi sínu Portúgal áður en hann gekk í raðir Olympiakos sumarið 2019. Hann lék sinn fyrsta landsleik fyrir Portúgal í fyrra sem síðan hafa orðið þrír en var ekki valinn í hóp landsliðsins sem fór á EM í sumar.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.