Tónlist

Föstudagsplaylisti Johnny Blaze og Hakka Brakes

Hjalti Freyr Ragnarsson skrifar
Eins og sjá má er um mikil galapín að ræða og engin leið að vita hvaða ærslagangi og gamanlátum má búast við næst.
Eins og sjá má er um mikil galapín að ræða og engin leið að vita hvaða ærslagangi og gamanlátum má búast við næst. JBHB

Jón Rafn Hjálmarsson, eða Johnny Blaze, og Hákon Bragason, eða Hakki Brakes, mynda elektróníska tvíeykið sem setti saman lagalista þessa föstudags.

Báðir eru þeir miklir þúsundlista smiðir, Jón helst í tónum og Hákon jafnframt í mynd. Báðir eru þeir því vel að verkefninu komnir.

Tónlist þeirra gleiðgosa er í anda níunda áratugarins, og eru þeir óhræddir við tilraunastarfsemi og að velta sér upp úr tengslum tækni og tónlistar. Samkvæmt Jóni vinnur dúóið hörðum höndum að annarri breiðskífu sinni en áður hefur það sent frá sér breiðskífuna Vroom Vroom Vroom og smáskífuna Beep Bleep Bloop.

Tilraunagleðin hefur skilað sér í þessu og hinu, hinu og þessu. Allt frá lagi sem er jafnlangt og aksturstími Hvalfjarðarganganna yfir í 360 gráðu upplifun af bifvélaverkstæði í lagi um eitt uppáhalds smurefni landsmanna.

„Lagalistanum vantar ekkert til þó drengirnir séu uppteknir. Listinn er rúnturinn frá byrjun kvölds til endaloka.“ Svo lýsa rúntbúntin sjálf uppröðun sinni á lögum í ákveðna úthugsaða runu til áhlustunar. „Lögin eru valin af mikilli natni og nostrað stórkostlega við uppröðun þeirra svo að enginn verði svikinn.“ Svei mér þá. Það er þá ekki eftir neinu að bíða.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.