Erlent

Leiðtogi Sannra Finna dregur sig í hlé

Kjartan Kjartansson skrifar
Kjör Jussi Halla-aho sem formanns Sannra Finna árið 2017 varð til þess að flokkurinn klofnaði.
Kjör Jussi Halla-aho sem formanns Sannra Finna árið 2017 varð til þess að flokkurinn klofnaði. Vísir/EPA

Jussi Halla-aho, leiðtogi Sannra Finnra, ætlar ekki að sækjast eftir endurkjöri í formannskjöri á landsfundi flokksins í Seinäjoki í ágúst. Hann segist þó ætla að sitja áfram sem þingmaður flokksins.

Halla-aho hefur verið formaður hægripopúlíska flokksins Sannra Finna undanfarin fjögur ár. Hann tilkynnti um ákvörðun sína um að gefa ekki kost á sér sem formaður áfram á stafrænum fundi með félögum sínum í dag, að sögn finnska ríkisútvarpsins YLE.

Sagði Halla-aho félögum sínum að það væri ekki gott fyrir leiðtoga að gerast of þaulsetinn. Þá byrjaði hann að trúa því að hann væri ómissandi. Lýsti hann ekki yfir stuðningi við neinn mögulegan eftirmann sinn.

Ville Tavio, formaður þingflokks Sannra Finna, sagði að tækifæri fælist í brotthvarfi Halla-aho sem formanns.

Kjör Halla-aho sem formanns sumarið 2017 varð kveikjan að deilum sem klufu flokkinn. Eftir þingkosningar árið 2015 tóku Sannir Finnar sæti í ríkisstjórn Juha Sipilä forsætisráðherra. Sipilä vildi ekki halda stjórnarsamstarfinu áfram eftir að Halla-aho náði kjöri sem formaður Sannra Finna. Halla-aho er harðlínumaður í innflytjendamálum og var eitt sinn dæmdur til að greiða sekt vegna ummæla sinna um tengsl íslamstrúar og barnaníðs annars vegar og að Sómalar væru þjófar.

Meiri en helmingur þingmanna Sannra Finna sagði þá skilið við þingflokkinn og hélt áfram í ríkisstjórninni. Þingmönnunum var vikið úr flokknum í kjölfarið, þar á meðal Timo Soini, fyrrverandi formanni flokksins til tveggja áratuga. Halla-aho og þeir sem eftir voru í þingflokknum fóru í stjórnarandstöðu.

Sannir Finnar eru næst stærsti flokkurinn á finnska þinginu og stærsti stjórnarandstöðuflokkurinn. Klofningsflokkurinn Blái umbótaflokkurinn þurrkaðist hins vegar út í þingkosningunum árið 2019.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.