Alan Shearer vill að lið geti gert tímabundnar skiptingar er leikmenn fá höfuðhögg

Jayden Bogle og George Baldock fengu báðir höfuðhögg þegar Sheffield United mætti Leeds í ensku úrvalsdeildinni í gær. Jayden Bogle var strax skipt út af, en George Baldock spilaði í 11 mínútur áður en hann fékk skiptingu.

Alan Shearer tjáði sig um málið í samtali við Amazon Prime í dag. 

„Það þarf að breyta þessu fljótt,“ sagði Shearer.

„Mér finnst þetta ósanngjarnt gagnvart læknateyminu. Það er verið að setja allt of mikla pressu á þau að taka ákvörðun og að taka ákvörðun hratt.“

Shearer vill að þjálfarar geti tekið leikmenn út af tímabundið á meðan læknateymið metur stöðuna.

„Baldock á að mega koma út af og vera skoðaður eins lengi og þarf. Á meðan á annar leikmaður að koma inn á tímabundið og svo getur Baldock komið aftur inn á ef hann er fær í það.“

Enska úrvalsdeildinn gerði tilraun í febrúar þar sem liðin fengu tvær auka skiptingar fyrir menn sem höfðu fengið höfuðhögg.