Ísland hefur leik á EM gegn Rússlandi á fimmtudaginn. Auk þeirra eru Frakkland og Danmörk í riðlinum. Íslensku strákarnir eru brattir fyrir mótið og ætla sér í útsláttarkeppni þess sem fer fram um mánaðarmótin maí-júní.
„Það er raunhæft, algjörlega,“ sagði Stefán Teitur á fjölmiðlafundi frá Györ í Ungverjalandi í dag.
„Þessi riðill er mjög sterkur. Danirnir og Frakkarnir eru með mjög sterk lið og allir hjá Rússunum eru að spila í efstu deild þar í landi. En við teljum okkur eiga mjög góða möguleika á að komast áfram.“
Patrik tók í sama streng og Stefán Teitur. „Ég held að við eigum mjög góða möguleika,“ sagði markvörðurinn.
„Þetta er erfiður riðill eins og flest allir eru búnir að segja. En það sem við höfum sérstaklega fram yfir hin liðin er þetta íslenska DNA og liðsheildina. Það er hægt að fara svo langt á henni og við ætlum okkur að ná í fleiri leiki.“
