Innlent

Brýnt að virða tilmæli því á morgun gæti mengun orðið lífshættuleg

Margrét Helga Erlingsdóttir skrifar
Frá gosstöðvunum í Geldingadal í gær.
Frá gosstöðvunum í Geldingadal í gær. Vísir/Vilhelm

Náttúruvársérfræðingur segir að staðan á eldgosinu sé svipuð og í upphafi og að það sé ekkert sem bendi til þess að því ljúki í dag. Biðlað er til fólks um að virða tilmæli almannavarna því þegar lægir á morgun gæti gosmengun í Geldingadal orðið lífshættuleg.

Bryndís Ýr Gísladóttir, náttúruvársérfræðingur hjá Veðurstofu Íslands segir að litlar breytingar hafi orðið á eldgosinu.

„Eins og er þá er [staðan] svipuð og hún hefur verið frá því það byrjaði. Það er áframhaldandi hraunrennsli.“

Á gostímabili sé eðlilegt að ýmist aukist eða dragi úr ákefð gossins til skiptis. Því sé afar hæpið að draga ályktanir um endalok þess út frá vefmyndavélum á vettvangi.

„Þetta getur komið í hviðum þannig að það er ekki hægt að segja til um þetta strax út frá vefmyndavélum að dæma. Við erum bara að horfa á þetta öðrum megin. Við sjáum ekki hvað er að ske hinum megin.“

Við mælingar í morgun kom í ljós að gasmengun er á gossvæðinu í Geldingadal og er mælingin komin upp fyrir hættumörk.

„Síðast var mælt hjá okkur í gær. Við vitum ekki hver staðan er hjá okkur núna en fólk frá okkur fer að mæla eftir hádegi en þær tölur sem talað var um í morgun komu ekki frá okkur heldur viðbragðsaðilum með handmæla.“

Bryndís segir að á morgun sé afar líklegt að gosmengun fari upp úr öllu valdi í dalnum því þá er útlit fyrir að dragi úr vindi og þá safnast gas frekar fyrir.

„Þá verður mun meiri hætta á gassöfnun ofan í dalnum við gosstöðvarnar og getur þá orðið lífshættulegt.“

Aðspurð hvort almenningi verði meinaður aðgangur að svæðinu alfarið ef mengunin mun teljast lífshættuleg svarar Bryndís því til að það sé líklegt en erfitt sé að fá fólk til að fara að tilmælum.

„Það er spurning hvort það sé hægt. Þeir sem ætla sér að fara munu örugglega finn leið. En það munu að öllum líkindum koma tilmæli frá okkur, almannavörnum og viðbragðsaðilum að það verði alls ekki sniðugt að fara ef aðstæður verða þannig. Eins og sást í nótt var búið að vara við vondu veðri og fleira og björgunarsveitir voru á fullu að hjálpa fólki.“

Svona hegðun valdi mun meira álagi á björgunarsveitirnar og stofni lífi fjölda fólks í hættu.

Eru einhverjar vísbendingar um að það gæti farið að gjósa á fleiri stöðum?

„Það er alltaf möguleiki á að það opnist einhvers staðar á því svæði sem gangurinn liggur þannig að fólk þarf að hafa varann á og passa sig.

Eldgos í Fagradalsfjalli Almannavarnir Björgunarsveitir Grindavík

Tengdar fréttir

„Svo breytist vind­áttin stöðugt þannig að þetta eru ekki góðar að­stæður“

„[Aðstæður á gosstöðvunum] eru ekki mjög góðar. Það er svolítið mikið rok þarna, gerir haglél og alls konar. Svo er mikil mengun þarna sem safnast fyrir í lægðum og dældum alls staðar.“ Þetta segir Samúel Þorsteinsson hjá Björgunarfélagi Akraness sem hafði verið á gosstöðvunum frá klukkan eitt í nótt.

Vaknaði í Grindavík og fattaði að líklega væri verið að leita að honum

Daniel Höhne, þýskur karlmaður búsettur á Íslandi, er eigandi bíls sem fannst mannlaus austan við Grindavíkurveg til móts við Bláa lónið í morgun. Hann lagði upp í göngu klukkan tólf á hádegi á sunnudag og í stað þess að fara aftur að bíl sínum ákvað hann að gista í Grindavík og sækja bílinn daginn eftir.

Þyrla Gæslunnar kölluð út til leitar

Lögreglan á Suðurnesjum óskaði eftir aðstoð þyrlu Landhelgisgæslunnar upp úr klukkan hálfátta í morgun til að aðstoða við leit að fólki í nágrenni gosstöðvanna í Geldingadal.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið