Bíó og sjónvarp

Já-fólkið eftir Gísla Darra í forvalinu til Óskarsverðlaunanna

Sylvía Rut Sigfúsdóttir skrifar
Já-fólkið er gamansöm, hálf-þögul teiknimynd um fjötra vanans.
Já-fólkið er gamansöm, hálf-þögul teiknimynd um fjötra vanans. Já-fólkið

Stuttmyndin Já-fólkið eftir Gísla Darra Halldórsson er á meðal tíu stuttmynda sem eru í forvalinu fyrir tilnefningu til Óskarsverðlauna í ár.

 Já-fólkið á möguleika á að hljóta tilnefningu sem besta stutta teiknimyndin eða „Animated Short Film.“ Tilnefningarnar verða tilkynntar opinberlega þann 15. mars næstkomandi. Myndin var sýnd hér á landi á RIFF Heima kvikmyndahátíðinni á síðasta ári. 

Gísli Darri Halldórsson leikstjóri myndarinnar skrifaði einnig handritið og sá um klippingu. Myndin er á íslensku en með enskum texta. Inn á myndina tala meðal annars Helga Braga Jónsdóttir, Ilmur Kristjánsdóttir, Jón Gnarr, Kristján Franklín Magnús, Sigurður Sigurjónsson og Þorvaldur Davíð Kristjánsson.

„Já-fólkið er teiknimynd sem fjallar um íbúa í ónefndri blokk sem vakna einn vetrarmorgun og rútína hversdagsleikans tekur við - hvort sem það er vinnan, skólinn eða heimilislífið. Við fylgjum fólkinu í einn sólahring en þegar líða tekur á daginn fer lífsmunstur hvers og eins að kristalla persónurnar (dugnaður, leti, fíkn og ástríða). Um kvöldið eru allir komnir heim og um blokkina ómar ýmist ástaratlot eða æpandi þögn sambandsleysis. Að lokum þarf hver og einn að horfast í augu við gjörðir dagsins. Þetta er gamansöm, hálf-þögul teiknimynd um fjötra vanans,“ segir um myndina á vef Kvikmyndamiðstöðvar.

Teiknimyndin er átta mínútur og 35 sekúndur og var frumsýnd á Minimalen Short Film Festival þann 24. janúar á síðasta ári. Framleiðendur eru Arnar Gunnarsson og Gísli Darri fyrir framleiðslufyrirtækið Caoz.

Alls hafa níu Íslendingar verið tilnefndir til Óskarsverðlaunanna en á síðasta ári braut tónskáldið Hildur Guðnadóttir blað í sögu íslenskrar kvikmyndagerðar með því að vinna Óskarsverðlaun fyrir tónlist sína í myndinni Joker. Þar með varð hún fyrsti Íslendingurinn til að vinna Óskarinn.


Tengdar fréttir






Fleiri fréttir

Sjá meira


×