Fótbolti

Guðbjörg fékk veiruna og finnur enn enga lykt

Sindri Sverrisson skrifar
Guðbjörg Gunnarsdóttir hefur leikið 64 A-landsleiki og farið með Íslandi á þrjú stórmót. Hún stefnir á sitt fjórða stórmót, EM í Englandi 2022, og ætlar að leika með Arna-Björnar fram að því.
Guðbjörg Gunnarsdóttir hefur leikið 64 A-landsleiki og farið með Íslandi á þrjú stórmót. Hún stefnir á sitt fjórða stórmót, EM í Englandi 2022, og ætlar að leika með Arna-Björnar fram að því. vísir/daníel

Guðbjörg Gunnarsdóttir þarf ekki að fara í sóttkví við komuna til síns nýja knattspyrnufélags Arna-Björnar í Noregi, frá Svíþjóð, vegna þess að hún smitaðist af kórónuveirunni um miðjan nóvember.

Guðbjörg og kærasta hennar, Mia Jalkerud, flytja eftir fáeinar vikur með eins árs gamla tvíbura sína til Björgvin í Noregi frá Stokkhólmi, þar sem þær voru áður leikmenn Djurgården. Guðbjörg segir það einfalda flutningana og ákvörðunina um að fara núna til nýs félags í öðru landi, að þær Mia skuli hafa smitast af veirunni og séu nú með mótefni gegn henni.

„Ég fékk veiruna bara daginn eftir síðasta leik tímabilsins,“ segir Guðbjörg. Eftir að hafa fætt tvíburana William og Oliviu 31. janúar í fyrra náði hún að vinna sig inn í lið Djurgården og leika þrjá síðustu leikina í sænsku úrvalsdeildinni í nóvember. Síðasti leikurinn var 15. nóvember og Djurgården náði að halda sæti sínu í deildinni.

„Það má því segja að þetta hafi verið góð tímasetning til að veikjast, en þetta var samt mjög erfitt þegar maður er með svona lítil börn. Ég fékk hita og við misstum báðar bragð- og lyktarskyn. Bragðið er eiginlega komið til baka en ég finn enga lykt enn þá. Þetta er mjög skrýtið allt saman. Foreldrar mínir voru einmitt hérna í heimsókn og smituðust líka en fengu engin einkenni,“ segir Guðbjörg.




Fleiri fréttir

Sjá meira


×