Strætó fullur af snjó

„Dyrnar hafa opnast í veðurofsanum og strætóinn var fullur af snjó þegar ég kom að honum í morgun,“ segir Hlynur Bragason sem rekur strætisvagnaþjónustu á Egilsstöðum í samtali við Vísi.

Svo virðist sem sterkar vindhviður hafi feykt hurðinni á strætisvagninum upp í nótt og þannig hafi snjórinn átt greiða leið inn í vagninn. Þannig hafði Kári nægan tíma til þess að fylla vagninn af snjó.

„Það urðu nú engar skemmdir. Við bara mokuðum þessu út. Þetta reddaðist allt,“ segir Hlynur glaður í bragði. Hann segir veðrið hafa lagast talsvert. „Ég segi nú ekki að veðrið sé orðið gott. Ég er hérna á Egilsstöðum og það er búið að lægja mikið. En það getur vel verið að veðrið sé alveg vitlaust hérna í kring.“

Hér að neðan má sjá myndir af strætisvagninum, fullum af snjó.