Stjórnmál ekki lengur samvinna heldur illkvittin

Sigmundur Davíð Gunnlaugsson, forsætisráðherra, sakaði stjórnarandstöðuna um ala á tortryggni varðandi skuldaaðgerðir ríkisstjórnarinnar og sagði umræðurnar vera farnar úr því að vera samvinnustjórnmál í það að vera illkvittin stjórnmál. Þetta kom fram í máli forsætisráðherra í atkvæðagreiðslu í lok annarrar umræðu um frumvarp ríkisstjórnarinnar um höfuðstólslækkun húsnæðislána.

Árni Páll Árnason, formaður Samfylkingarinnar, sagði að skuldavandinn yrði enn til staðar eftir að frumvarpið verður samþykkt, en fjármagnið yrði búið og að forsætisráðherra væri að misskilja gagnrýni stjórnarandstöðunnar.

„Ummæli forsætisráðherra og fjármálaráðherra bera þess merki að hvorugur þeirra hefur hirt mikið um að taka þátt í umræðum um þetta mál fyrir þinginu. Það er misskilningur að við í stjórnarandstöðunni höfum staðið gegn þessu máli og reynt að sá tortryggni. Við höfum hinsvegar bent á ágalla þess, sem eru þeir að nú er verið að ráðstafa opinberu fé án tillits til þess hvort fólk hafi orðið fyrir tjóni eða ekki. Það er grundvallarákallið á þessu máli sem veldur því að það er ekki hægt að styðja það. Hæstvirtur forsætisráðherra virðist ennþá halda að þetta sé jákvæð efnahagsaðgerð,“ sagði Árni.

Steingrímur J. Sigfússon sagði kosningaloforðin svikin. Peningarnir komi úr ríkissjóði og aðgerðirnar í heild fjármagnaðar þaðan. Sigmundur lá þá ekki á skoðunum sínum og kallaði úr þingsal í þeirri andrá „Virkilega?“

„Það er ekki verið að leiðrétta. Það er ekki einu sinni látið það líta úr fyrir að verið sé að leiðrétta einhvern tiltekinn forsendubrest. Það er eins fjarri öllu lagi að hæstvirtur forsætisráðherra geti staðið hér í ræðustól, sperrt sig og sagt að það sé staðið við kosningaloforð um að leiðrétta allan verðbólgubrest um 100 prósent,“ sagði Steingrímur.

Stjórnarandstaðan sagði aðgerðirnar meingallaðar og fór hörðum orðum um aðgerðir ríkisstjórnar og forgangsröðun hennar.

Atkvæðagreiðsla um frumvarpið fer nú fram á Alþingi. Frumvarpið felur í sér áttatíu milljarða niðurgreiðslu skulda á verðtryggðum húsnæðislánum.