Hermann gæti misst af byrjun tímabilsins með Portsmouth

Landsliðsfyrirliðinn Hermann Hreiðarsson er á sjúkralista hjá Portsmouth eftir að hafa tognað í læri í æfingarleik gegn Eastleigh á dögunum og fór því fyrir vikið ekki með liðsfélögum sínum í æfingarferð til Portúgal.

Knattspyrnustjórinn Paul Hart óttast að Hermann verði ekki klár í slaginn þegar boltinn byrjar að rúlla í ensku úrvalsdeildinni 15. ágúst.

„Við verðum bara að bíða og vona það besta. Þessi meiðsli í læri geta oft verið leiðinleg að eiga við því það má ekki fara of snemma af stað. Það er því tæpt að hann nái sér á tveimur vikur fyrir fyrsta leik en við skulum sjá til," segir Hart í viðtali við staðarblaðið The News í Portsmouth.