Hittast vegna Biophilia-verkefnis

Ísland fer með formennsku í Norrænu ráðherranefndinni á þessu ári. Í því felst m.a. að leiða ýmis norræn samvinnuverkefni og er Biophilia-kennsluverkefnið eitt af þeim.

Biophilia er viðamikið verkefni, þróað af Björk Guðmundsdóttur, og er byggt á víðtækri þátttöku fræðimanna, vísindamanna, listamanna, kennara og nemenda á öllum skólastigum. Það byggist á því að nota sköpun sem menntunar- og rannsóknaraðferð þar sem náttúruvísindi, tónlist og tækni eru tengd saman á nýstárlegan hátt.

Í tilefni af formennskuárinu 2014 óskuðu íslensk stjórnvöld eftir samstarfi við hin Norðurlöndin um frekari þróun Biophiliu kennsluverkefnisins. Staðbundin samstarfsnet verða sett á öllum Norðurlöndum, þ.m.t. Álandseyjum, Færeyjum og Grænlandi. Í þessari viku hefur hópur norrænna sérfræðinga með vísindamönnum, listamönnum, fræðimönnum og kennurum innanborðs fundað hér á landi til þess að skerpa á og betrumbæta verkefnið auk þess að finna nýjar og frumlegar leiðir, og hugmyndir, sem nýta má í kennslunni.