Segir málþóf ástæðu fyrir seinkun á niðurfellingu skulda

Sigmundur Davíð Gunnlaugsson forsætisráðherra sakaði stjórnarandstöðuna um málþóf í fyrirspurnartíma á Alþingi í gær. Tilefnið var að Svandís Svavarsdóttir, VG, spurði ráðherrann hvenær yrði hægt að sækja um niðurfellingu skulda á vef Ríkisskattstjóra en búið var að tilkynna að það yrði hægt frá og með gærdeginum.

Sigmundur Davíð sagði að hægt yrði að sækja um skuldaleiðréttingu um leið og þinghlé verður gert í vor. Hann sagði ástæðuna fyrir því að ekki var hægt að gera það í gær þá að stjórnarandstaðan hafi lagst í dæmalaust málþóf. Hann sagði að Ríkisskattstjóri væri tilbúinn og gæti ýtt á takkann um leið og þingið hefði afgreitt frumvarpið.

Skúli Eggert Þórðarson ríkisskattstjóri segir undirbúning embættisins vegna frumvarpsins hafa miðað vel.

„Það ætti ekki að taka lengur en einn til tvo daga að opna svokallaða höfuðstólslækkun eftir að þau lög fara í gegnum þingið. En lögin um ráðstöfun séreignarsparnaðar krefjast meiri undirbúnings og því þurfum við tvær helgar til að ljúka þeirri vinnu,“ segir Skúli.

Eftir að umræðum um lagasetningu á verkfall flugmanna var lokið í gær, hófust umræður um skuldaleiðréttingarfrumvarp ríkisstjórnarinnar. Kristján Möller, fyrsti varaforseti Alþingis, sagði í gær að enn væri stefnt að þinghléi í kvöld eða nótt.