Segja þolinmæði kennara vera á þrotum

Mikill hiti var í grunnskólakennurum sem lögðu niður vinnu í gærmorgun. Í stað þess að kenna söfnuðust þeir saman á útifundi á Ingólfstorgi og víðar um land til að leggja áherslu á kröfur sínar um bætt kjör.

„Það var frábært að sjá þessa miklu samstöðu og okkur þykir vænt um að foreldrar hafi líka mætt til að sýna okkur stuðning í verki,“ segir Geirlaug Ottósdóttir, kennari í Háaleitisskóla, sem las upp ályktun á fundinum á Ingólfstorgi sem var samþykkt.

Í ályktuninni segir að vinnustöðvunin sé neyðarúrræði sem kennarar hafi verið þvingaðir í vegna seinagangs viðsemjenda við samningsgerðina. Grunnskólakennarar hafi verið samningslausir í tvö ár og nú sé þolinmæði þeirra á þrotum.

„Við höfum tekið á okkur mikið aukaálag eins og aðrar stéttir. Nú er bráðum komið nóg. Við viljum fara að sjá breytingar. Fleiri og fleiri af þeim yngri í stéttinni eru að hugsa sér til hreyfings. Þeir segjast ekki ætla að byrja í haust án samnings. Það er kominn tími til að krefja frambjóðendur og sveitarstjórnarmenn svara um hvernig þeir sjá þetta fyrir sér,“ segir Geirlaug.

Formaður Félags grunnskólakennara sagði við Fréttablaðið í gærkvöldi að viðræður kennara við sveitarfélögin haldi áfram í dag.