Erlent

Biden sagður ætla að til­nefna Becerra sem heil­brigðis­ráð­herra

Atli Ísleifsson skrifar
Xavier Becerra gegnir nú embætti dómsmálaráðherra Kaliforníu en sat þar áður á Bandaríkjaþingi á árunum 1993 til 2017.
Xavier Becerra gegnir nú embætti dómsmálaráðherra Kaliforníu en sat þar áður á Bandaríkjaþingi á árunum 1993 til 2017.

Joe Biden, verðandi Bandaríkjaforseti, hyggst tilnefna Xavier Becerra, dómsmálaráðherra Kaliforníu, til að gegna embætti heilbrigðisráðherra í ríkisstjórn sinni.

New York Times segir frá þessu, en Biden eða starfslið hans hafa enn ekki staðfest upplýsingarnar. NBC segir frá því að Biden hafi hringt í Becerra á föstudaginn.

Ljóst er að nýs heilbrigðisráðherra bíður ærið verkefni en verkefni sem tengjast viðbrögðum Bandaríkjastjórnar við heimsfaraldri kórónuveirunnar munu að stórum hluta lenda á hans borði.

Hinn 62 ára Becerra hefur áður átt sæti í fulltrúadeild Bandaríkjaþings en þar sat hann árunum 1993 til 2017. Hann var jafnframt í forsvari fyrir bandalagi nokkurra ríkja sem börðust gegn tilraunum Donalds Trump og stjórnar hans að leysa upp sjúkratryggingakerfið sem kennt er við Barack Obama, fyrrverandi Bandaríkjaforseta, hið svokallaða Obamacare.

Þá segir Politico frá því að Biden hafi ákveðið að tilnefna Rochelle Walensky sem nýjan forstjóra Lýðheilsustofnunar Bandaríkjanna, CDC. Hún starfar sem prófessor við Harvard-háskólann og stýrir smitsjúkdómadeild Massachusetts General Hospital.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×