Ari mögulega hættur en vill fá ungu strákana í landsliðið hægt og rólega

Ari Freyr Skúlason segir það ekki ljóst hvort leikurinn við England á Wembley hafi verið hans síðasti landsleikur á ferlinum.

Ari er 33 ára gamall og hefur farið með íslenska fótboltalandsliðinu í gegnum glæstustu tíma í sögu þess. Hann var í byrjunarliðinu í öllum leikjum á EM 2016 þegar Ísland komst í 8-liða úrslit, lék einnig með liðinu á HM 2018 og á alls að baki 77 A-landsleiki.

„Það gæti bara vel verið að ég hafi verið að spila minn síðasta landsleik en á sama tíma þá er ég ekki tilbúinn að koma með neinar yfirlýsingar þannig að við sjáum bara hvað setur,“ segir Ari í viðtali við Morgunblaðið.

Ari fer því svipaða leið og Kári Árnason og Hannes Þór Halldórsson sem einnig hafa sagt að leikurinn við England gæti hafa verið þeirra síðasti, en vilja ekkert útiloka.

Ísland fær nýjan landsliðsþjálfara fyrir næstu leiki sína en liðið hefur undankeppni HM í mars. Hugsanlegt er að nýr þjálfari vilji ráðast í róttækar breytingar á landsliðshópnum. Ari segir hins vegar ljóst að þó að Ísland eigi fullt af efnilegum leikmönnum sé best að fara varlega í sakirnar:

„Mín skoðun er sú að það þurfi að fá þessa ungu stráka inn hægt og rólega í stað þess að henda þeim beint út í djúpu laugina. Þeir þurfa að læra hvað íslenska landsliðið stendur fyrir en framtíðin er klárlega spennandi og jafnframt krefjandi líka fyrir íslenskan fótbolta.“