Fótbolti

Vill að Jón Daði byrji í kvöld

Sindri Sverrisson skrifar
Hæfileikar Jóns Daða Böðvarssonar í loftinu gætu nýst Íslandi í kvöld að mati Hjörvars. Jón Daði kom ekkert við sögu gegn Rúmeníu í undanúrslitum umspilsins í síðasta mánuði en lék gegn Danmörku og Belgíu í ÞJóðadeildinni.
Hæfileikar Jóns Daða Böðvarssonar í loftinu gætu nýst Íslandi í kvöld að mati Hjörvars. Jón Daði kom ekkert við sögu gegn Rúmeníu í undanúrslitum umspilsins í síðasta mánuði en lék gegn Danmörku og Belgíu í ÞJóðadeildinni. Vísir/Vilhelm

Nánast allt byrjunarliðið sem mætti Króatíu í úrslitaleik ytra um sæti á HM fyrir sjö árum er til taks í Búdapest í kvöld í úrslitaleik Íslands við Ungverjaland um sæti á EM.

Guðmundur Benediktsson velti vöngum yfir mögulegu byrjunarliði Íslands í kvöld með sérfræðingum sínum, Sigurvini Ólafssyni og Hjörvari Hafliðasyni, í Sportinu í kvöld í gærkvöld.

Gummi benti á að ef Erik Hamrén kysi svo gæti hann stillt upp sama byrjunarliði og mætti Króatíu í Zagreb 2013, fyrir utan að Eiður Smári Guðjohnsen hefði lagt skóna á hilluna. Liðið sem mætti Króatíu má sjá hér að neðan.

Svona var byrjunarliðið í seinni umspilsleiknum við Króatíu fyrir HM sem fram fór í Brasilíu 2014. Aðeins Eiður Smári Guðjohnsen er ekki með núna.

Sérfræðingarnir telja þó líklegast að byrjunarliðið verði nánast það sama og í undanúrslitaleiknum við Rúmeníu í síðasta mánuði. Eina breytingu verður þó að gera því að Arnór Ingvi Traustason fékk ekki að koma til Ungverjalands eftir að liðsfélagi hans hjá Malmö greindist með kórónuveiruna. 

Líklegast er talið að Skagfirðingurinn Rúnar Már Sigurjónsson, leikmaður Astana í Kasakstan, komi inn í hans stað.

Rúnar Már Sigurjónsson er í líklegasta byrjunarliðinu að mati sérfræðinganna.

Hjörvar kvaðst reyndar sjálfur vilja setja Jón Daða Böðvarsson á vinstri kantinn. „Af hverju? Því hann er góður í loftinu. Það er þá hægt að spyrna upp á hann og hann getur farið í þetta. Svo er hann ágætur í föstum leikatriðum, bæði í sókn og vörn. Hann er bara með þrjú landsliðsmörk en þau hafa komið í alvöru leikjum. Hann hefur reynsluna og þekkinguna og er búinn að spila mikið með gamla bandinu,“ sagði Hjörvar.

Önnur leið væri að gefa Birki Má Sævarssyni sæti í byrjunarliðinu á nýjan leik. Birkir datt út úr byrjunarliðinu í fyrra og missti um tíma sæti sitt í landsliðshópnum en var valinn á ný í síðasta verkefni og bæði skoraði og lék afar vel gegn Belgíu í síðasta landsleik.

Komi Birkir Már inn í liðið telja sérfræðingarnir að Guðlaugur Victor færist inn á miðjuna og Birkir Bjarnason á kunnuglegar slóðir á vinstri kantinum.

Birkir Már Sævarsson gæti verið í byrjunarliði Íslands og það litið svona út.

Loks veltu Gummi og félagar því fyrir sér hvernig það kæmi út að spila með 3-5-2 leikkerfi, líkt og Ísland hefur prófað gegn Belgíu og Frakklandi á síðustu árum.

„Ég veit að þeir eru ekki að fara að gera það. Það væri alveg úr karakter. En væri einhver spurning um að koma aðeins á óvart? Hvernig myndu Ungverjar bregðast við?“ spurði Gummi.

„Við höfum aldrei gefið þessu leikskipulagi tækifæri nema í „ómögulegum“ leikjum,“ benti Hjörvar á.

„Ég hef aldrei séð þetta virka eins vel og á móti Belgum síðast,“ sagði Sigurvin og bætti við: „Yfirleitt hefur mér þótt þetta algjörlega mistakast, en mér fannst ganga mjög vel síðast. Það væri fróðlegt, ef við teljum okkur vera betri en Ungverja, að prófa að „matcha“ þá með 3-5-2 gegn 3-5-2.“

Svona gæti byrjunarlið Ungverja litð út í kvöld.
Klippa: Sportið í kvöld - Byrjunarlið Íslands

Tengdar fréttir




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.