Kynna rafknúnar vetnisvélar sem leið til orkuskipta í flugi

Kristján Már Unnarsson skrifar 12. október 2020 22:12

Airbus hyggst þróa þrjár mismunandi tegundir flugvéla, sem eiga að vera tilbúnar til mengunarlauss farþegaflugs árið 2035. Verkefnið kallast ZEROe eða Zero-emission-aircraft. Mynd/Airbus.

Dash 8-flugvélum, eins og þeim sem notaðar eru hérlendis í innanlandsfluginu, verður hægt að fljúga á mengunarlausu vetni eftir fjögur ár í stað flugvélabensíns, nái áform bandarísks fyrirtækis fram að ganga. Flugvélaframleiðendur horfa nú til vetnis sem milliorkugjafa fyrir rafknúnar flugvélar. Fjallað var um málið í fréttum Stöðvar 2.

Tuttugu mínútna flugferð einhreyfils sex sæta Piper-flugvélar frá flugvelli norðan við London í síðasta mánuði á vegum breska félagsins ZeroAvia markar stórt skref í átt að orkuskiptum í fluginu. Það má kalla hana rafknúna vetnisvél en efnarafall um borð umbreytir vetnisgasi í rafmagn, sem knýr rafmótor. Þannig er hægt að skipta þungum rafgeymum út fyrir vetnisgas, sem er léttara en loft.

Flug þessarar sex sæta Piper Malibu-flugvélar ZeroAvia, sem breytt var í rafknúna vetnisvél, vakti mikla athygli. Hún flaug frá Cranfield-vellinum norðan við London þann 24. september.Mynd/AP News.

„Það eina sem þessi flugvél losar á flugi er vatnsgufa,“ sagði Val Miftakhov, forstjóri og stofnandi ZeroAvia, þegar hann kynnti fréttamönnum verkefnið, sem styrkt er af breskum stjórnvöldum.

„Við höfum einnig sett upp innviði sem tryggja að sjálf vetnisframleiðslan er mengunarfrí. Hún er hrein.

Vélin er ekki eins hávær og þeir sem fljúga henni finna ekki fyrir sektarkennd að fljúga,“ sagði forstjóri ZeroAvia.

Airbus hyggst þróa fljúgandi væng til að flytja farþega. Mynd/Airbus.

Airbus kynnti einnig í síðasta mánuði þróunarverkefni af svipuðu tagi, með þremur mismunandi tegundum flugvéla, þar á meðal fljúgandi væng fyrir allt að tvöhundruð farþega. Bæði á að nota vetni beint til að knýja sprengihreyfla en einnig að nota vetnisgas sem millimiðil til að knýja rafmagnsmótora. Markmið Airbus er að koma slíkum vélum í farþegaflug eftir fimmtán ár.

Universal Hydrogen hyggst breyta bensínknúnum Dash 8-flugvélum í rafknúnar vetnisflugvélar innan fjögurra ára. Öftustu sætaraðir verða fjarlægðar til að koma fyrir vetnisgasgeymum.Teikning/Universal Hydrogen.

Bandaríska félagið Universal Hydrogen telur hins vegar ástæðulaust að bíða svo lengi og vinnur að lausn sem gæti kannski nýst innanlandsflugi Íslendinga innan fárra ára. Félagið, sem Airbus á reyndar hlut í, hyggst umbreyta Dash 8-skrúfuþotum, eins og þeim sem Air Iceland Connect notar, til að unnt verði að fljúga þeim á raforku í stað flugvélabensíns. Fjarlægja á tvær öftustu sætaraðirnar til að koma þar fyrir geymum fyrir vetnisgas og búnaði til að breyta því í rafmagn og eiga fyrstu vélarnar að vera komnar með lofthæfisskírteini árið 2024.

Hér má sjá frétt Stöðvar 2:

Fréttir af flugi Umhverfismál Loftslagsmál Orkumál Airbus Samgöngur

Tengdar fréttir

Spáir því að Íslendingar fljúgi á rafmagni innan 7 til 8 ára

Rafmagnsbylting er framundan í flugsamgöngum, að mati flugáhugamannsins Friðriks Pálssonar, sem spáir því að rafknúnar flugvélar verði farnar að fljúga í innanlandsfluginu innan sjö til átta ára.

9. júní 2020 23:24

Samfylkingin vill rafvæðingu flugsins á samgönguáætlun

Þingmenn Samfylkingarinnar hafa lagt til á Alþingi að rafvæðing styttri flugferða verði strax sett inn á samgönguáætlun. Fyrsti flutningsmaður, Albertína Elíasdóttir, segir raunhæft að innanlandsflugið verði rafvætt á næstu fimm til átta árum.

10. júní 2020 23:33

Sjá fyrir sér að Keflavík verði rafhleðslustöð alþjóðaflugs

Keflavíkurflugvöllur gæti orðið mikilvæg rafhleðslustöð fyrir fyrstu kynslóðir rafknúinna flugvéla sem ætlað er að komast yfir Atlantshafið. Hugmyndin var rædd á kynningarfundi þróunarfélags flugvallarins á dögunum.

17. júní 2020 08:07

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.