Létu rífa verndað hús við Skólavörðustíg

Hús við Skóla­vörðustíg 36 sem um árabil hýsti búsáhaldaverslun Þorsteins Bergmann var rifið í gær. Nikulás Úlfar Más­son, bygg­ing­ar­full­trúi Reykja­vík­ur, segir í samtali við Morgunblaðið að ekki hefði legið fyr­ir leyfi til þess að rífa húsið þar sem það nyti vernd­ar byggðamynst­urs.

Nikulás segir að eigandi hafi aðeins haft leyfi til að byggja hæð ofan á húsið en ekki að rífa það. Eig­andinn segir hinsvegar í samtali við blaðið að öll tilskilin leyfi hafi legið fyrir og að verkið hafi verið unnið í fullu samráði við eftirlitsaðila. Því hafnar Nikulás og segir að málið verði rannsakað nánar í dag.

Húsið að Skólavörðustíg 36 var reist árið 1922. Breyting á deiliskipulagi fyrir húsið var samþykkt árið 2018 en á vef Reykjavíkurborgar segir að í breytingunum felist að „auka byggingarmagn á 1. hæð að suðvestur lóðarmörkum, nýta þakhæð 1. hæðar að hluta sem þaksvalir og stækka og hækka stigahúsið.“

Húsið var auglýst til sölu í fyrra og er fasteignaauglýsingin enn í birtingu. Þar er húsið skráð 150 fermetrar og sérstaklega tilgreindur 132 fermetra viðbótarbyggingarréttur á lóðinni. Eignin skiptist þá í verslunarhæð auk íbúðar eða skrifstofuhúsnæðis á efri hæð og í risi.

Fréttin hefur verið uppfærð.