Innlent

Starfsmannalög heimila flutning embættismanna milli embætta

Heimir Már Pétursson skrifar
Ólafur Helgi Kjartansson lögreglustjóri á Suðurnesjum hefur ekki tjáð sig við fjölmiðla um málefni embættisins að undanförnu.
Ólafur Helgi Kjartansson lögreglustjóri á Suðurnesjum hefur ekki tjáð sig við fjölmiðla um málefni embættisins að undanförnu. Stöð 2/Arnar Halldórsson

Ráðherra getur fært lögreglustjórann á Suðurnesjum milli embætta enda liggi samþykki hans fyrir í þeim efnum. Skipun lögreglustjórans í embætti var framlengd á síðasta ári og á hann rétt til að gegna embætti að minnsta kosti þar til hann næst sjötugs aldri eftir þrjú ár.

Alda Hrönn Jóhannsdóttir.

Allir þeir sem koma að málefnum lögreglustjóra embættisins á Suðurnesjum hafa meira og minna haldið fjölmiðlum frá sér eftir að átökin þar sprungu út á dögunum fyrir utan stuttorðaðar yfirlýsingar frá Öldu Hrönn Jóhannsdóttur yfirlögfræðingi embættisins og þremur öðrum æðstu undirmönnum Ólafs Helga Kjartanssonar lögreglustjóra og frá Áslaugu Örnu Sigurbjörnsdóttur dómsmálaráðherra.

Í yfirlýsing fjórmenninganna, sem hafa gengið undir nafninu matarklúbburinn hjá embættinu, var öllum ásökunum á hendur þeim vísað á bug án frekari rökstuðnings og í yfirlýsingu ráðherra sagði að verið væri að skoða málin innan ráðuneytisins og á meðan myndi hún ekki tjá sig opinberlega. Hún hefur síðan verið á ferðlagi um landið að undanförnu í orlofi og lítið annað að frétta af málum en það sem haft hefur verið eftir ónafngreindum heimildarmönnum.

Áslaug Arna Sigurbjörnsdóttir er sögð hafa beðið Ólaf Helga Kjartansson um að flytja sig um set frá Suðurnesjum til Vestmannaeyja.Vísir/Vilhelm

Nú síðast í gær greindi Fréttablaðið frá því að ráðherra hafi beðið Ólaf Helga að flytja sig til og taka við embætti lögreglustjórans í Vestmannaeyjum sem nú er laust. Ólafur Helgi vildi ekkert segja um þessi mál þegar eftir því var leitað í dag. Hann var fyrst skipaður í embætti lögreglustjórans á Suðurnesjum árið 2014 og var sú skipun endurnýjuð í september í fyrra og nær að minnsta kosti til þess þegar hann verður sjötugur árið 2023, en hann verður 67 ára í haust.

Í lögum um réttindi og skyldur starfsmanna ríkisins segir í 36. grein að „stjórnvald, sem skipað hafi mann í embætti, geti flutt hann úr einu embætti í annað, enda heyri bæði embættin undir stjórnvaldið," í þessu tilviki dómsmálaráðherra.

Þá segir í sömu grein að „stjórnvald, sem skipað hafi mann í embætti, geti flutt embættismann í annað starf án auglýsingar, enda liggi fyrir ósk eða samþykki embættismannsins sjálfs," eins og segir í 36. grein laganna.

Sérfræðingar í lögum um réttindi og skyldur opinberra starfsmanna sem fréttastofa ræddi við segja réttindi skipaðs embættismanns ansi mikil, svo framarlega sem hann hafi ekki beinlínis brotið af sér í starfi og brugðist hafi verið við því með viðeigandi hætti. Vilji dómsmálaráðherra flytja Ólaf Helga frá Suðurnesjum verði það að gerast í samráði við hann, gæta þurfi meðalhófs við ákvörðunina og Ólafur Helgi verði að njóta andmælaréttar sé hann ekki sáttur við ákvörðun dómsmálaráðherra.

Þá hefur ráðherra heimild til að færa embættismenn til starfa hjá öðru stjórnvaldi, eða undir öðru ráðuneyti, og beri þá að tryggja að hann njóti sömu launakjara og í fyrra embætti.


Tengdar fréttir

Ráðherra sagður hafa sagt Ólafi Helga að fara til Eyja

Áslaug Arna Sigurbjörnsdóttir, dómsmálaráðherra, er sögð hafa tilkynnt Ólafi Helga Kjartanssyni, lögreglustjóra á Suðurnesjum, um flutning hans til Vestmannaeyja. Styr hefur staðið um störf Ólafs Helga hjá lögreglunni á Suðurnesjum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×