Innlent

Útlendingar búsettir á Íslandi eru búbót hjá ferðaþjónustubændum

Kristján Már Unnarsson skrifar
Jón Hrafn Karlsson og Linda Ösp Gunnarsdóttir, ferðaþjónustubændur á Syðri-Steinsmýri í Meðallandi.
Jón Hrafn Karlsson og Linda Ösp Gunnarsdóttir, ferðaþjónustubændur á Syðri-Steinsmýri í Meðallandi. Stöð 2/Einar Árnason.

Útlendingar sem búa á Íslandi hafa reynst drjúg búbót í kórónufaraldrinum fyrir ferðaþjónustubændur í Skaftárhreppi, sem segjast bjartsýnir á að komast í gegnum hremmingarnar. Þetta kom fram í fréttum Stöðvar 2.

Þau Jón Hrafn Karlsson og Linda Ösp Gunnarsdóttir búa á bænum Syðri-Steinsmýri í Meðallandi með fjögur börn. Þau eiga nýjasta íbúðarhúsið í sveitinni en þau fluttu hingað af Suðurnesjum fyrir fimm árum til að sinna þjónustu við ferðamenn og veiðimenn.

Fjölskyldan flutti í Skaftárhrepp frá Suðurnesjum fyrir fimm árum.Stöð 2/Einar Árnason.

En hvernig skyldu ferðaþjónustubændur eins og þau vera að fara út úr kórónufaraldrinum?

„Tappinn var náttúrlega tekinn úr ferðamanninum. En það hefur verið rennerí af Íslendingum,“ segir Jón Hrafn.

„Og líka bara af útlendingum sem búa á Íslandi. Það tíndist aðeins af þeim fyrst, sko. Eins og þeir væru komnir í smáfrí frá vinnunni sinni og ákváðu að fara á flakk,“ segir Linda Ösp.

„Já, fólk sem var kannski að vinna við ferðaþjónustu og bjó á Íslandi, það fór að ferðast,“ segir Jón Hrafn.

Bærinn Syðri-Steinsmýri er í jaðri Eldhrauns, sem rann í Skaftáreldum árið 1783.Stöð 2/Einar Árnason

Þau eru með gistirými fyrir 32 gesti í þremur sumarhúsum en einnig í veiðihúsinu við Eldvatn, sem þau reka. Þau segja að Íslendingarnir séu líka farnir að skila sér.

„Það er sérstaklega byrjað um helgarnar að koma Íslendingar. Núna er þetta að bókast svolítið hjá okkur,“ segir Linda.

Þau segjast ekki örvænta. Þau komist af, að minnsta kosti meðan fjölskyldan sé bara ein í þessu, en fleiri gesti þyrfti ef standa ætti undir starfsmanni.

Þau hafa ekki treyst sér til að ráða starfsmann, eins og undanfarin ár, en það gæti breyst þegar traffíkin aukist í ágúst þegar veiðin hefjist og þá þurfi væntanlega að finna starfsmann. Þau eiga samt ekki von á neinni uppsveiflu.

„Það verður örugglega rólegt að gera í vetur,“ segja þau.

Tvíbýlt er á Syðri-Steinsmýri. Þau Jón Hrafn og Linda Ösp búa á bænum sem nær stendur.Stöð 2/Einar Árnason.

Staðsetningin á Suðausturlandi hjálpi því megnið af erlendum ferðamönnum vilji sjá Jökulsárlón.

„Þó að margir fari kannski bara að Vík þá eru mjög margir sem vilja sjá Jökulsárlón. Þá komum við sterkt inn.

Það líka hjálpar að við erum með heita potta. Það er mjög vinsælt. Líka hjá Íslendingunum,“ segir Linda Ösp

Hér má sjá frétt Stöðvar 2:


Tengdar fréttir

Sex sveitarfélög fái samtals 150 milljónir króna

Sex sveitarfélög fá samtals 150 milljóna króna framlag frá ríkinu nái tillögur meirihluta fjárlaganefndar fram að ganga. Þá er gert ráð fyrir allt að 4,5 milljarða króna heimild til Ferðaábyrgðasjóðs vegna endurgreiðslu pakkaferða.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.