Draugamark er enski fótboltinn snéri aftur

Aston Villa og Sheffield United gerðu markalaust jafntefli er þeir mættust í fyrsta leiknum eftir kórónuveiruhléið en nýliðarnir áttust bak við luktar dyr á Villa Park.

Gestirnir komust næst því að skora. Á 42. mínútu virtist Oliver Norwood vera koma Sheffield United en Michael Oliver dæmdi ekki mark. Hann benti á úrið sitt og sagði að marklínutæknin hafi ekki sagt að hann væri inni.

Gestirnir voru allt annað en sáttir með þessa ákvörðun því boltinn virtist langt yfir línuna. Oliver studdist þó, eðlilega, við marklínutæknina og dæmdi ekki mark. Ekkert mark var annars skorað í leiknum og lokatölur 0-0.

Aston Villa er í 19. sæti deildarinnar með 26 stig, stigi frá öruggu sæti, en Sheffield United er í 6. sæti deildarinnar með 44 stig, fjórum stigum frá Meistaradeildarsæti. Ólíkt gengi nýliðanna.